غايتو الذكاء الاصطناعي ده لو دخل في مجالات الشعر الجويه .. وده متوقع جدا جدا
في ظل الراهن العلمي .. حقو كل الشعرا يتطلبو الله ويشوفو ليهم شغله تانيه .. يرتاحو من السهر وهم الكتابه الما جايبا ليهم غير الفقر ..
بي اختصار انتو قادرين تتصورو نحن عايشين في زمن علمي مجنون .. كده تعال بس شوف الغنا المسكين ده .. انت ما عليك غير تدوس بي طرف اصبعك علي جهاز صغير كده مجرد دوسه .. وخلال ثلاث ثواني يسلمك الجهاز قصيده ومن تأليفك كمان .. وانت ما عليك إلا تدخل القصيده جهاز تاني وتطلع ليك اغنيه كامله ما ناقصه الا السكسكه .. وفي احتمال تجيك بي سكسكتا …
طبعا الجهاز ابن الكلب ده وبي امكانتو الساحره دي حيلغى ليك اتحاد شعراء الاغنيه بي
جرة قلم .. واتحاد المهن من زمن العميد احمد المصطفى لي زمن الأخ نجم الدين الفاضل ..
ومن المتوقع ينتهي من كل الوسط الفني .. بس معلومات تنزلا على الجهاز .. مثلا .. مثلا
واحد داير يعمل اغنيه في واحده .. بس ينزل مواصفاتا حسب ذوقو المخستك ..
العيون كده والخدود كده .. الطول كده والعرض كده .. ويروح دايس الزر .. ثواني
تجيك القصيده باللغه الانتا حددتها ما بين لغات العالم
انا داير فرنساوي شان بحب إيطاليا ..
ثواني ويستلم القصيده عليها الختم الدولي ..
داير شعر دموع يديك .. سهر يديك .. رسايل يديك .. والبنات سكر نبات أشكال وألوان .. بس انت اطلب ..
وطن في .. ٠سلام في .. حرب في .. بس الشي الوحيد الما قالو لينا ..
احساس الناس .. ومشاعر
الناس .. في ياتو زر في الجهاز
…
الذكاء الاصطناعي .. بجيب
احساس الناس كيف وكيف بوفر ليهم مشاعر اصطناعيه عشان يتماهو مع الطفره العلميه دي ..
انا بعترف اننا لا يمكن نقدر نقيف في مواجهة الطفره المجنونه دي بس كمان حقو
نعمل حسابنا منها .. ده لو خليناها حتضيعنا …
طبعا في كتار منكم قايلين كلامي ده كلام ونسه ساي ..
المهم غدا لناظره قريب ََ.. وانا
تحسبا للأمر بفكر جادي في صاج طعميه .. ما هو في الزمن ده كلو حنيه ..
عبدالوهاب هلاوي
