هشام علي
، نعم هو في عداء ل(تأسيس) لكن حببببة كده ونااااعم ، بجيبو سيرتهم مررررة مرة عند الضرورة القصوى والاحداث الصارخة .. لكن كل غضبهم وهجومهم مصبوب على ناس (صمود) الرفضوا المشاركة في (تأسيس) ..
هنا في سؤال موغل في السذاجة ، :
هم معادين (تأسيس) ليه أصلاً ؟؟ حتى لو عداء نص كم ؟؟
ما ياهم كلهم ناسهم وحبايبهم وصنيعة يديهم ، مضاف ليهم نفرين تلاتة لي هسي – حسب علمي – ما لاقي تفسير لأنضمامهم لتأسيس ..
كان على (حميدتي) وجنجويده فهم تفريخ الكيزان وولادتهم وتسمينهم ، وشريك البرهان في إنقلابه .. وما تقول لأنهم قتلوا واغتصبوا ونهبوا وسرقوا السودانيين والسودانيات ، كل الموبقات دي الكيزان عملوها معاه وكانوا بتفاخروا بإجرامه وبتبوبروا بأنه (حمايتي) .. والبرهان عمل كل الموبقات دي مع الجنجويدي تحت إمرة سيدهم (المخلوع) ، وعملها في فترة شراكته معاه في الإنقلاب ، و (البرهان) كان بتفتاخر بإجرام شريكه وبقول (الدعم السريع حماية النايمين في بيوتهم) ..
وكان على جوز سيادي الأنقلاب (الهادي إدريس والطاهر حجر ) ما مشوا بعيد من البرهان ، مشاركين شريكه في الانقلاب ، قتلوا واغتصبوا وسرقوا الشعب السوداني سوا من كراسي سيادية ما ساي ..
وكان على باقي المغاضبين من قيادات الحركات ناس (صندل) وغيره ، فكانوا بهتفوا للبرهان “الليلة ما بنرجع الا البيان يطلع” بصوت واحد مع الكيزان في إعتصام الموز ، وقتلوا وأغتصبوا ونهبوا وسرقوا السودانيين والسودانيات في مواكب الثورة ضد الإنقلاب ..
وكان على الود (ابراهيم الميرغني) ، فده ملح كل الأنظمة ، كيزان وإنقلاب وهسي جنجويد ، مشارك في كل موبقاتهم ، ولو جو “الهكسوس” إحتلوا البلد حيلقى ليه وزارة معاهم ..
وكان على (التعايشي ونصر الدين عبد الباري) فديل طلقاء البرهان وحميدتي ، المافي زول هبشهم – ولا حتى الكيزان – لمن كان رفاقهم في حكومة الفترة الإنتقالية في زنازين الإنقلاب ..
ومافي داعي أجيب سيرة (حسبو محمد عبد الرحمن) أسألوا (كاشا) البلاقيه أكتر من ناس بيتهم ..
موش ياهم ناس البرهان والكيزان ؟؟
ففعلاً يعادوهم فوق كم ؟؟
يعادوا (صمود) الرفضت تمشي وتنحاز معاهم .. ويشيلوها كل أوزارهم وتتحمل ما لأنها إتمسكت بالحياد الأعلنته من أول يوم في الحرب وبتنادي بإيقاف الحرب واستعادة مسار التحول الديمقراطي وبس ، بل تتحمل لأنه (صمود) هي الجابتو لنفسها من الأول بمشاركة ديل ، ودي نقطة نجيها يوم تاني كان الله مد في الآجال في صحة وعافية.
#جنجويد_رباطة
#اي_كوز_ندوسو_دوس
#مافي_مليشيا_بتحكم_دولة
#العسكر_للثكنات_والجنجويد_ينحل
