امدرمان ما محتاجة ليكم ياخ : بقلم امير احمد السيد

منو القال ليكم امدرمان طفل يحبو في مساحات دولة الضلال ومنو القال ليكم امدرمان محتاجة للحنان ، امدرمان لمت وجمعت ووزعت الحب وحتى النيلين ازرقهم وأبيضهم من منبعهم اتلاقوا في امدرمان وحضنوا بعض ومشوا متحدين وحاموا مع بعض لا تفرق بينهم لا بالفتنه ولا باي غيرها ولا تستطيع ان تفصل بينهما ولا تفرق بينهم وعندما كان ذلك الحضن العظيم الدافئ جاءت المودة فساروا متحدين ما بتقدر تفرق بين أبيضه وازرقه كذا البشر فيها وكأنهم أتوا في مركب نوح من كل جنس زوجين وتزاوجوا وأنتجوا جنس آخر نوبة وجعليين حلفا وفور برنو وحضور وبرتى وكنوز وشوايقة وفلاته انتجوا جنس واحد اسمه امدرمان واختلطت اللهجات فكونت لهجة واحدة اسمها الامدرمانية وصنعوا الحب فاصبحت امدرمان هي ملهمهم الجميل الذي يلهمهم الحب
ناس زي ديل محتاجين لدولتكم في شنو ؟ لا حاقدين لا حاسدين لا عنصريين لا بيحبوا الفتنه ولا الحروب ولا الغدر ولا بيزرعوا الخوف
امدرمان أمان وسلام ومحبة وحب فشنوا نحنا والله العظيم ما محتاجين ليكم ولا عاوزنكم شيلوا سودانكم وامشوا مننا شيلوا تاريخكم وامشوا مننا شيلوا عنصريتكم وغوروا مننا نحنا الأقدر ان نصنع كل التاريخ بالحب فقط بالحب والأمن والسلام وبحبك يا امدرمان