المشية زاتا وقدلتو

بمناسبة يوم المشى العالمى…
إذا علمنا أن تماسك الجسد و متانة بنائه نتيجة لحسن التغذية يلعب دورا في طريقة المشية ، فإننا عموم السودانيين نمشي بطريقة متفردة ، نتيجة طبعا لسوء التغذية … و كل زول يمشي على كيف كيفو و بنفسية إنه (بقدل فوق عديلو) والشارع حقو وكدا.. فهناك من يتجدع في مشيته فالحتة فاضية ومافى ايييي مشكلة ، هناك من تتل يدها و تفردها أمامها و كأنها بتعوس فى كسرة , و هناك من تمشي متمهلة و في بالها أن المراة لا يستحب أن تسرع في مشيتها ، هناك من يمشي مصنقع و زي دا عمرو ما حيلقى ليهو حاجة واقعة وعلى العكس البمشى مدنقر ممكن تضربو كبة او ينطح ليه حيطة … هناك من يكش خاصة إذا إنتعل شبشبا ويكتح كتيح الجن و اذا كان زول مسلط و فرفار و بتحاوم في الحوش بالليل فيستحسن أن يطرد من البيت فورا .
وهناك قصة حقيقية لرجل طلق زوجته بحجة إنها تمشي و كل كراع مقبلة على بلد … و عندما عاتبوه علل بأن مشيتها تشابه مشية الضفدعة القعونجة -الواحدة دي – طيب ما القعونجة بتمشي عمرها كله كدا سمعتو بقعونج طلقا ؟!! اما إنك إنسان عجيب ياخ .
و تختلف طريقة مشي الرجال عن النساء بسبب أن للنساء حوض أكبر و يحتجن لبذل جهد اكثر عند المشي لذلك نلاحظ تمايلهن , طبعا واحدات بزيدنو , الا أن هناك تمايل زيادة أحيانا بسبب الضعفة , و الواحدة بكون حيلها ما شايلها و(جات تتلولو فينا زي قصبة الجرف)
ويمكن التعرف على هوية الشخص من قياس ذبذبات الأرض أثناء المشي , و قيل أن هذا علم قديم لدى العرب يسمونه (القيافة) , كما يقال ان الكلاب عندما تضع آذانها على الأرض تتعرف على أصحابها بتلك الذبذبات ..ما تركزوا كتير هسه يجوا يغيروا نظرياتهم دى…
وأشهر مشية هي مشية عارضات الازياء و التي تكون بطريقة معينة القصد منها توضيح تفاصيل الزي الذي تعرضه , و في مرة شاهدت جدتي عارضات يمشين بسرعة شديدة و يخبطن الارض بقوة , و كن كثيرات فقالت وهي منهمكة في (نقض مشاطها) :
– البنات الدايرات ينكفن على وشهن ديل مالن !! يابت تعالي مشطي لي مسايري ديل …. الله يكفينا شرهن .
و قد تغزل الشعراء منذ القدم في (المشية) فقالوا .. كأن مشيتها من بيت جارتها مر السحابة لا ريث و لا عجل …. , و قال شعراؤنا … معجب بجمالو و بي فتنة مشيهو و بي اسحار عيونو وشنو كدا ماعارفة …. ترم ترم ترم …
الآن الشوارع المحفرة والمياه الآسنة المستديمة صيفنا على خريفنا على شتانا أخفت شكل مشيتنا وأضاعت هويتها فالجميع يتنقز ويتقافز كذلك إزدحام الشارع بالباعة ودواب الأرض الآلية خلى كل زول ماشى بى صفحته-with 🤣his page