انا لدغت
ظلت جارتى تنبهنى بلطف لأنسكاب الشاى على ثيابى ذات انهماك ونسى معها (تعبير جديد سجلت له براءة اختراع عشان مافى زول يشيلوا)وتقول وهى تضحك :-جاياك قروش كتيييرة …وتجينى قروش كتيرة بمناسبة شنو؟والله الا كان القاها واقعة….علما بأننى لم اجد اى شئ ملقى على الارض طوال عمرى هذا سوى مبلغ واحد جنية سودانى ذات نهار غائظ ولم انحنى لاخذه …. بسبب وجع الضهر!!. عند عودتى للبيت سألت والدتى عن صحة المقولة فقالت: ناس البلد بيقولو القهوة ما الشاى…..عشان تعرف فى السودان دا اى زول يقطع ويديك !
لكل الشعوب معتقدات لا تخضع للعقل ولا المنطق ولكن البعض لا زال يؤمن بصحتها …فرفة اعلى الجفن تعنى انك ستشاهد شخصا لم تشاهده منذ مدة اما اذا كانت الرفة فى الاسفل فمعناها البكاء وتخاف بعض النساء من ذلك وتجد الواحدة تتفل فى اصبعها وتمسد فى عينا وهى تبسمل وتدعو: اللهم اجعله خيرا…بينما يفسرها المتخصصون بانها تعنى ضعفا فى عضلة العين عند تكرارها.
اما اذا (اكلتك)راحة يدك فستستلم فلوسا ،ويتفلسف البعض ويشرح اكتر…. اذا الحكة قى طرف اليد القروش ما حقتى واذا فى بطن الكف حقتى وبالطريقة دى فان امينة الصندوق تسكت تتكرش من يوم واحد فى الشهر الى يوم سبعة الموعد المحدد لتسليم الصرفة عند عموم افراد الشعب السودانى الفضل .
اذا التصقت بك خيوط العنكبوت (الشبشة) فستتكسى كسوة معتبرة ،وبمناسبة الهدوم يقال فيها اذا لبست جلبابك سهوا بالمقلوب فانه فأل حسن بينما تفسرها بعضهن بأن زوجك سيتزوج عليك لذلك احرصن حبيباتى بان تكون هدوم زوجك مرتبة فى الدولاب و(بالعدلة)مش تكاوشيها من الحبل ومرات بمشابكها وتحشريها فى الدولاب ….عشان فاضين ليه كمان داير يعرس يعرس فى زول ماسكو … بس يضلل الولاد ويطهر البيوت!!!
مشاهدة شباشب مقلوبة فأل سيئ عند معظم الناس لذلك تجد دائما من يسارع ويعدل من اوضاعها بينما ينصح البعض بقلب النعال عند اندلاع شكلة لاعتقادهم بانها تساهم فى (حريرها)ان شا الله تقلع اللابسو …فمشاهدة شكلة والالتفاف حولها والالمام بتفاصيلها غريزة (عديييل كدة ) عندمعظم شعوب العالم الثالث وبى الفقر والمرض المزمن دا اظننا صنفنا من شعوب العالم التاسع وما جايبين خبر ! ولا زال بعض سائقى الباصات والبكاسى يضعون طوبة اذا كانت امرأة واحدة بمعيتهم فى رحلة سفر ….هو عليك الله ما بارك الله فيها المستحملة كوراكم وغلاطهم وتفل سفاتهم ….الخ تقول لى شنو !.
خليك من الاعتقادات البتمسك بيها البسطاء فقد حكت لى امرأة اثق فى ما تقول بان شخصا له هيبة ومكانة فى قريتهم وله محاضرات ومناظرات مشهودة اوصى بان لا يختنوا ابناءهم يوم السماية عشان ما يطلع الولد كضاب …. الكضب الواحد دا! اما وصيته عندما يلدغ احدهم من عقرب وكثيرا ما تحدث فى منطقتهم فعلى الملدوغ عدم الانزعاج والصراخ والجرى للمستشفى بل عليه بالذهاب الى ناحية حمارة والدة جديد ويمسك أضانا ويهمس (انا لدغت،انالدغت،انالدغت ثلاث مرات)طبعا تخيلت الحمارة تنهره:-وانا مالى …لدغتك أنا عليكم الله شوفوا الزول الاهبل دا !!!هذا اذا لم ترفسه وتلقى به بعيدا بسبب زهجها من برنامج الولادة دا !!!.
