انا ما عارف الليله كده فجأه اتذكرتا حكاية صاحبي داك الجاني وعندو أغرب مشكله يتصورا انسان .. صاحبي ده نسيت ما قلت ليكم شاب وسيم وخلوق ومتعلم ومن اسره كويسه .. مشكلتو انو اتعرف لي بي بيت ما شاء الله عليها .. هي ذاتا زي ما بقول حبتو شديد .. اها لما فكر يمشي يطلبا من اهلا قالت لي بي صراحه انا خايفه .. خايفه من شنو الله لا قدر .. قالت لي بي صراحه أبوي هلالابي متعصب وانت زي ما عرفت منك مريخابي .. طبعا صاحبي ضحك ولي هنا قايل الموضوع مجرد هزار .. لكنها كانت جاده .. قال ليها دخل الهلال والمريخ في زواجنا شنو .. أكدت لي انها عارفه ومتأكده من ده لكن ابوها كده ..
وبي صراحه انت ما أول مريخابي ابوي يعصلج في زواجي منو َ.. المهم انا وريتك ..
لي هنا وصاحبي برضو ما ماخد الموضوع جد .. وفعلا حسب الموعد صاحبي ساق أبوه وعمو وأخو ومشو .. أبو البت استقبلهم احسن استقبال .. كان
راجل سبعيني كده بتاع معاشات .. وفي نص الونسه فاجأ ليك صاحبنا .. انت يا ولدي هلالابي واللا مع الجماعه
ديك .. صاحبي اخدت ليك ضحكه خفيفه كده وسكت .. عمك قال لي ما قلت لي يا ولدي .. طبعا صاحبي عندو فكره كامله .. والله ياعمو انا مريخابي .. وفجأه عمك اتغير ميه وتمانين درجه .. جاهو لون وطار منو لون .. سكت كده وصنقع ودنقع وحكا دقنو وقال بي صراحه كده أنا من الاول كنت خايف من دي .. انا اذا ولدي ذاتو .. جناي من لحمي ودمي لما عرفت َ انو مريخابي قربت اطردو من البيت .. اجي علي اخر عمري أدى بتي الفضلت لي لي واحد مريخابي
عشان بعد كم سنه يملا لي البيت احمر ..
طبعا ابو صاحبي وعمو وأخو ما عرفو اليقولو شنو .. وعمك اخد لي سكته وقال لي يا ولدي الزواج قسمه ونصيب .. انت اصلا مافيك عيب واسرتك ما شاء الله لكن معليش حكاية انك مريخابي دي شويه كده ما راكبا لي في راسي ..
ابوي قال لي .. ياحاج اولا الحمد لله انو عيب ولدي زي ما بتقول مريخابي .. وما فيه عيب تاني .. رغم انو الموضوع ده ما ليهو اي علاقه لا بالعيب ولا بالزواج اللهم الا انتو عندكم اسباب تانيه وطبعا ده من حقكم .. وفي النهايه البت بتكم والولد ولدنا..
صاحبي قال لي انا ذاتي بعد كلام ابوي اتشجعت حبتين وقالت لي ابو البت … الشي
البنعرفو اذا جاءكم من ترضون دينا فزوجوه .. ما فريقا ..
الحاج وقف طولو وقال لي ..
لا ان فريقا وتيما كمان .. شن قولك …
شخصيا حكيت ليكم بي قصة
صاحبي الحكاها لي بي التفصيل
الممل .. انتهت على شنو .. والله ما عارف .. آخر مره
فارقت صاحبي كان في غرفة تسجيلات الهلال .. البت كانت في غرفة تسجيلات المريخ .. سجلو ما سجلو ما عارف .. وجايز البت ظهر ليها وكيل أعمال اتسجلت في واحد من الانديه الليبيه .. والله اعلم َ
ع. هلاوي
