تكتب منشور في فيسبوك إنك ضد الحرب والتقتيل والانتهاكات والتشريد ، يسوقوك المحكمة بدستة بلاغات نصها مواد جنائية بتودي المشنقة

هشام علي ودقلبا
تكتب منشور في فيسبوك إنك ضد الحرب والتقتيل والانتهاكات والتشريد ، يسوقوك المحكمة بدستة بلاغات نصها مواد جنائية بتودي المشنقة .. ويجيك (محمد الياس) الشهير ب (الشايقي) شاهد ضدك قدام المحكمة ممسح وبرتبة ومنصب قيادي في مليشيا (براؤون) يأدي القسم على المصحف سطر سطر ويشهد عليك عشان يوديك المشنقة مباشرة لأنك خائن عميل منشورك في فيسبوك إتسبب في هزائم كتيرة في الميدان ..
أها بعد كم يوم الشاهد ده زااااتو يتقبض بهرب سلاح وذخيرة للجنجويد !!
منشورك بتاع الفيسبوك بوديك المشنقة خائن وعميل إتسببت في هزائم عظيمة ، لكن بيع وتهريب السلاح والذخيرة للعدو عاااادي طالما البائع قائد ممسح من (براؤون) !!
يا ربي الذخيرة والسلاح الباعهم قائد (براؤون) المفدى للجنجويد بكون إتقتل بيهم كم فرد من الجيش والمستنفرين والمواطنين ؟؟
يا ربي تحت تهديد السلاح الباعه قائد (برؤون) المبجل للجنجويد ، إتهتك كم عرض وأغتصبت كم طفلة ؟؟
يا ربي كم طلقة من الذخيرة الهربها ليهم إستقرت في جسد طفل وإمرأة وشيخ عجوز ؟؟
يا ربي مع السلاح والذخيرة قائد (براؤون) العظيم ده بكون باع للجنجويد كم معلومة استخباراتية إتسببت في هزائم وسقوط مدن وقرى وموت مواطنين أبرياء وتشريد ونزوح ؟؟
يا ربي هو براه البعمل كده ولا في كتاااار زيو في (براؤون) ؟؟
عزيزي القارئ الأسئلة أعلاه ومعاها الأسئلة البتخطر على بالك أسألها في سرك بينك وبين نفسك ، لأنه لو جاهرت بيها بسوقوك المحكمة بتهم الخيانة والعمالة ، وشهود (براؤون) الحيودوك المشنقة راقدييييين.
لا تتعجب ، إنه السودان في عهد السجمان دلدول الكيزان.
#محن