هشام علي
– كان إنت معول عليها ، الرباعية دي ما جمعية خيرية ، ولا شلة أصحابك جايين يصالحوك بصاحبك الشاكلتو أمبارح وانتو كلكم أصحاب في شلة واحدة .. الرباعية هي زاتها جزء من الحرب بمصالح أعضاءها .. يعني الحل البجي منها ما حيكون أحلامك ورغباتك سليقة كده ، لاااا أبداً حيكون حل ملايق بمصالح أعضاءها ، فيه مصالح الأمارات مع الجنجويد ، وفيه مصالح السعودية مع الجنرالات ، وفيه مصالح مصر الخاتف لونين شوية من مصالحها مع الأمارات وشوية من مصالحها مع السعودية والجنرالات ، وفيه مصالح ترمب الخاتف تلاتة ألوان ومصالحه مع الكل .. فيا إما تعول عليها وتقبل الملايقة دي بعيد من صفرية أحلامك ورغباتك ، أو تطور ليك أدوات ووسائل غيرها تعافر بيها.
– وكان إنت مابيها ، فبكرة كان الله عز وجل جعل طبق لايوقها ده واقع والمعول عليهم قبلوها ، فيا إما تسردب وتبلع كوراكك ضدها وتلتهم طبق اللايوق وإنت ساكت ، أو تطور ليك مبررات تقنع الأزعجتهم بكوراكك إنك مستمتع بالوجبة.
الحرب دي يومها المرقت من محيط القيادة العامة والخرطوم ، مرقت من يد الأشعلوها والبتحاربوا فيها ، فطالما هي ما في يدك فخليك واقعي كان معول عليها أو مابيها.
#ضد_الكيزان_وضد_الجنجويد
