د أحمد الطيب إبراهيم استشاري جراحة الكلي و المسالك يكتب – ((يا بنتي العرس ما كله احمر شفايف ))

بمناسبة تعين بروفسور معز عمر بخيت الرجل المبدع و الشاعر الاتعود انه الناس تصفق ليه .
يا بروف بل رأسك الموس الموس جاياك …
اها يا بروف بما انه الحكومة بقت حكومة بروفات خلونا نكلمكم بلغة الراندوق العدمانة شوية الزوق قبل كلام البروفات يجيكم.
في واحدة عايشة ليها قصة حب  و هيمانة في الرومانسية و جابت حبيبها لحدي البيت أتقدم ليها .. أمها رفضت وقفت ألف احمر انه الناس ديل ما يناسبوها .. البنت بتقنع في أمها انه بروفسور ومغترب و مروق و بحبووووو يا ماما و موووووووت فيه و يا هو يا انتحر .
أمها قالت ليها الولد أهله كعبين وبتاعين مشاكل و لو عرستيه و عصروا عليك اوعك تجي راجعة البيت
المهم البنت ركبت رأسها و كملت قصة حبها و الفنان في الزفاف غني أغنية ( حققنا آمنالنا والعاشق عقبالو ) تلاتة مرات..
تمت شهرين و جاءت راجعة البيت  حامل و مجلودة وماخذة ليها كم بوكس من اخوات العريس و قالت لي أبوها بس تطلقني من الناس ديل .
أمها قالت ليها البنج فكا خلاص وجيتي راجعة .. قومي اتخارجي علي نسابتك و بعد كده يا بنتي لو موتي بنفرش عليك هناك معاهم وأنا زمان قلت ليك العرس ده ما كله فساتين 👗 مخشلعة واحمر شفايف  .
هسا يا بروف نسابتك الماشي عليهم ديل اقصد ناس وزارتك ديل والله كعبين كعبين شديد .. ديل يا اخوي ناس الكنبة الوراء البسبوا الدين و بسفوا الصاعوت و بدقوا المدير اوعك تجينا راجع الموضوع يا اخوي ما. كله شعر ( قدااام قداااام. وراء اعدااااام ) .
اولاً الكيزان ضدك قول  واحد … وأنت عارف وأنا عارف والله عارف و ديل خطرين وأنت يا اخوي قلبك رهيف مافي شعر مافي غزل مافي جدية … جدية ذاتها لو جاءت تتحاوم في مكتبك قول ليها أتلمي  و بي تعيينك هم قالوا القحاتة رجعوا فأنت عندهم قحاتي .
تانيا العساكر ديل عندك معاهم قصيدتين زي السم أنا رأي ما تنكرهم وأول ما تلاقيهم تقولهن ليهم .. ولو ركبوا معاك راس ما ترخي ليهم اركب معاهم راس و قول ليهم إنتوا الناس القاتلوكم بالدانات و الراجمات اتقاسمتوا معاهم السلطة بقت علي قصايدي… داك القلم و ديك الورقة اكتبوا فيني ديوان .
ثالثا
ناس قحت يا زول ما تشتغل بيهم طالما أنت ما عندك حزب مبايعه ومافي زول منهم ماسك عليك ظرف زمان أو ظرف مكان أو ظرف دراهم  قوليهم (……. ) ح ارسل الح تقوله ليهم في الخاص .
لكن يا بروف والحق يقال ما تدخل في ضغوط والله نحن ما متوقعين منك كتير لا نحن وللا الشعب السوداني لن تكون أنت اول ولا آخر إحباطاتنا بإذن الله…. غايتو ح تكون اكرم نمبر 2 بس اكرم محظوظ كان وجد باقي مستشفيات و باقي كفاءات و معاه ناس قحت و مرافيد الحزب الشيوعي و ناس الدياسبورا كلهم ما شاء الله حلاقيم كبيرة وعيون كبيرة و كله كبيرة في كبيرة ومع ذلك كان اكبر إنجازته طلع قرار اعادة مستشفي الخرطوم في الورقة بس ولمن فات ما وصل مستشفي الخرطوم مسمار من انجازته .
الوصاية بالمهلة يا بروف و دي نصيحة كده لله…… يومك التصل بورتسودان الجماعة البرة ديل احظرهم كلهم وما تستشيرهم في حاجة وما تقرا كلامهم الفارغ ده ركز مع أهل الوجعة القاعدين هناك و خت الكورة في الواطاء ما تجي شايل لينا دواوينك بتاعة الشعر في اول خطبة الناس دايرة بنسلين ما دايرة شعر ,
و البنسلين يا تمرجي
نادوا الحكيم يا تمرجي
الوصية التانية :
لو كنت محظوظ د هيثم ده ما تخليه يسافر ويترك الوزارة و امسك فيه قوي لو وافق وان كان هيثم ده الفيه كملت .
يا اخي هيثم ده ولدنا الصغير كنا بترسلوا يملأ الأباريق والله بعد سنتين الحرب دي بقي اكبر من حبوبتي .
هيثم ده ياسعادتك اصغر منك بي كم وتلاتين سنة لكن والله كبير شديد و حكيم حكيم جد جد و ده اول وزير لا يلقي هجوم من الشيوعيين ولا من الكيزان ولا حتي ناس قحت ولا من العساكر … اقسم بالله هيثم ده لو قبضوه ناس الدعم السريع يرجعوا للباوقة و معاه تاتشرين هدية .
هيثم ده لحدي او امس لو اتصلت عليه من اي تلفون برد ولو مارد برجع ليك حتي لو تلفون مجهول .
اها يا بروف النشوف اخرتها … زمان كنت بقول ليهم ماني طالع من السودان إلا أشوف الطفأ النور منو ؟ لمن جوا ناس الكنبة الوراء طفوها لي في صلعتي و بقيت افتش للباب البتخارج بيهو ما لاقيه .
هسا النشوف اخرتها

و دمتم سالمين

د احمد الطيب إبراهيم