سناء.. الايام..

محمد عبدالله برقاوي..
صورتك في الخيال فكرة..
وصفك زينة النبرة..
بكتب في غناك واقراء..
اداوي الغصة بالذكرى..
حروفك في دمايا هتاف..
في الاعماق صدى وموال..
بحسك في شعوري وتر..
بيسال وين وكيف الحال..
بلقاك في الليالي حلم ..
في صفحة نهاري مقال..
زمان كانت مواعيدك..
مواسم بهجة زي العيد..
لقياك يا (سناءالايام )..
مشاتل في دروب الغيد..
كانت.. لهفتك خطوة ..
اقابلك و شوقي يزيد..
فجأة البينا امسى حطام .
غابت.. ضحكة ..الأنغام..
اهازيج .. الفرح ماتت..
ماعاد فيها باقي كلام..
مواعيدك بقت منية طيوف..
مرسومة .في الاحلام ..
مشيت أسأل شواطئ اللقيا..
كيف شهدت زمانا الراح…
لقيت قسماتها حزنانة ..
لابسة العتمة توب وو شاح..
رمالها الناعمة تتحسر ..
شب الموج قلدني وصاح .
سالني القمرة. وين رحلت .
وين راحت نجوم الليل..
نورها الكان لجين رقاش..
مسكوب فوق خدود النيل..
وقفت.. أفتش الجواب ..
كان تبريري ناقصو دليل .
سحبت النظرة منكسرة .
حبست.. العبرة… زي ..
جمرة. وخذلني… الحيل ..
قلت… الملم….. اشتاتي..
استحضر غناوي قبيل..
ابت ..من تاني.. قدراتي ..
صد غناي غلبني عديل..
دولة الإمارات العربية المتحدة ..
العين .. يونيو 1990