هشام علي ودقلبا
* هل حكومة وجيش السودان ممنوع من شراء الأسلحة ؟؟
= لا .. مافي أي منع أممي دولي لبيع وتوريد الأسلحة لحكومة وجيش السودان ..
* كيف الكلام ده ؟ وقرار مجلس الأمن رقم 1591 الصدر في 2005 وجددوه سبتمبر 2025 لحدي سبتمبر 2026 ، ده وضعو شنو ؟؟
= القرار ده يا عزيزي بمنع بيع وتوريد الأسلحة والمعدات العسكرية للأطراف المتحاربة داخل (ولايات إقليم دارفور فقط).
القرار سمح بتوريد الأسلحة والمعدات العسكرية للحكومة السودانية طالما أنها تُستخدم (خارج إقليم دارفور) ، وتخضع لضمانات “وثائق المستخدم النهائي” .. ودي طبعاً عشرين سنة بتحايلوا عليها .. لكن قانون قانون دولي كده مافي منع .. والجيش قبل وطول سنين الحرب إشتري الأسلحة والمعدات العسكرية ولسه بشتري بالعديييل من روسيا والصين وتركيا وغيرها ، وفي صفقات أعلنوها رسمي في الأخبار ، ووزير مالية حكومة البرهان في لقاء تلفزيوني قال الكلام ده عاااادي مافي شيء بحوج الدسدسة .. ياخ حتى في صفقة أسلحة معلنة رسمي مع باكستان إتعرقلت قبل أيام.
* طيب شنو كل شوية الأخبار جايبه لينا مرة (إيرانية) بايعه مسيرات وقنابل وذخيرة للجيش .. ومرة شبكة مقبوضة في الأمارات باسلحة مشحونة عبرها ؟؟
وقت الحكومة والجيش بقدروا يشتروا براهم ، الجابرهم شنو على السماسرة ديل ؟؟
= الأجابة في كلمة واحدة : حرمنه !!
* كيف ؟؟
= ديل الحرامية تجار الموت البقسموا مع جنرالات الداخل ..
تعال ناخد المثالين الضربتهم فوق في السؤال ديل :
(الإيرانية) السمسارة ماخده 10 مليون دولار عمولة سمسرة في صفقة واااااحدة قيمتها 70 مليون دولار ، واووول مرة اسمع بعمولة سمسرة في سلاح قريب 15% !!
ده غير ال 35% فرق العملة ، لأنها إستلمت بالدولار وبتسلم جنرالات إيران بالعملة المحلية ، وفرق سعر الصرف 35% ، دي 50% عديييل وأكيد ما أكلت براها ..
دي حالتها تفاصيل صفقة واحدة ولسه التحقيقات حتكشف باقي الصفقات البتوصل ل 300 مليون دولار .. وأحسب إنت براك 50% من 300 مليون دولار تطلع كم ؟؟
نجي للمثال التاني ..
قيمة الأسلحة المضبوطة في موضوع شبكة الأمارات 10 مليون دولار ، بينما حكومة وجيش السودان دافع للسماسرة ديل قيمة وعمولة 13 مليون دولار !!
يعني في 3 مليون دولار عمولة !!
ديل طبعاً شطحوا ونطحوا وقعدوا (الإيرانية) في الكنبة ، عمولة سمسرتهم 30% عديييييل !!
وقبل ما يجوا “عباقرة” تشتيت الكورة البجلوها واقفة يقولوا لي (إنت ما شايف الامارات والأسلحة البتديها للجنحويد) ..
إنتو يا عباقرة اليادووووب شفتوا الأمارات هسي ، نحن شايفنها وكتبنا عنها هنا من زمن توريد العربات المدرعة والبمبان لإنقلاب البرهان وحميدتي ، وكتبنا عن السلاح البتورده للحنجويد في الحرب وتابعناه من أبو ظبي لحدي افريقيا الوسطى وتشاد ثم دارفور .. جربوا عبقريتكم دي بعيد من هنا.
كلهم حرامية وسبب مباشر في إستمرار الحرب دي ، وقف الحرب بالنسبة ليهم كارثة ، وقفها بيعني وقف سيول دولارات الدم البتصب سحت في كروشهم .. كلهم حرامية وتجار موت ، جنرالات وكيزان وغواصات الثورة عملت منهم بشر ورجال أعمال للأسف سودانيين منعمين بثروات ملطخة بدم السودانيين .. وكللللهم بنعقوا فوق راسنا ليل نهار (حرب الكرامة حرب الكرامة) .. حرب بدفع فيها المواطن تمن الرصاصة البتقتله ومضاف عليه عمولة سماسرة الموت.
