كل الصرف والبذخ ده بتاع كامل إدريس وشلته عشان ركن نقاش حضروه 50 شخص 40 منهم أمنجية السفارة ومدللين الكيزان البتحميهم ..

هشام علي ود قلبا
كامل إدريس والأعيسر وشلة المخابرات والكيزان السافروا معاه .. سافروا على حسابنا ما في زول عزمهم وبالتالي مافي زول استضافهم .. سافروا سفر ملوكي ونزلوا في سويتات فنادق سبعة نجوم وفارهات للتنقل .. ده كله على حسابنا ..
بعد مهزلة الفاتيكان وصلوا لندن عشان كامل إدريس مشارك في ركن نقاش .. ايوة ركن نقاش الواحد ده .. كل الصرف والبذخ ده عشان ركن نقاش حضروه 50 شخص 40 منهم أمنجية السفارة ومدللين الكيزان البتحميهم ..
بعد نهاية ركن النقاش ، كامل إدريس وهو طالع هتفن في وجهه كنداكات إكسفورد (حرية سلام وعدالة ، مدنية خيار الشعب) .. هتاف الثورة البزعج ويهيج شياطين الكيزان والأمنجية ، وبكل عدم نخوة ورجوله إعتدى الذكور البيولجيين معدومي الرجولة على السودانيات بالضرب والسباب والشتائم ..
أولاً .. الأخوات الكنداكات المعتدى عليهن ، القانون بس ما تجاملوا الأمنجية والكيزان البحموهم ، بلوهم واسجنوهم ورجعوهم يورونا رجالتهم دي في أم صميمه وقازقيل ..
تانياً .. كامل إدريس ، الكرة الارضية كلها عارفه إنك “طرطور” ساي و “الطرطور” عنده شخصية أوضح وأقوى منك .. بس أقل شيء ديل أخواتك وبناتك سودانيات تم الإعتداء عليهن قدامك وعلى بعد سنتمترات منك ، وعلى يد كلاب حراستك والكيزان المعاهم ، ما حتبقى راجل حتى لو لمرة واااحدة وتدافع عنهن ؟؟
ثالثاً .. كامل إدريس .. هتاف (حرية سلام وعدالة ، مدنية خيار الشعب) ده هتاف الثورة الإتمسحت فيها ليل نهار وحاولت تسلقها .. الان بعد ما استلموا ريموتم بقى بزعجك وبهيج شيطانك ؟؟ الان بقيت تبارك قمع أي زول بهتف بيه ؟!! يخس ..
ذاكرة التاريخ ما بتنسى ولا بتتزور .. مجدك الشخصي وألبوم الصور البتجمع فيه وسيرتك الذاتية العاوز تضيف ليها “رئيس وزراء” – وده كله على حساب أمة كاملة – ما حتتهنى بيهم وحتتحاسب عليهم ، والفيديو حيظل قاعد ذكرى عار تطاردك لي أحفادك.
#الثورة_مستمرة