بعد التعليقات وردود الأفعال الحلوه على موضوع زمان يا
حيطان .. لقيتني بضرب في
الخيال واعيد واستعيد علي
اجمال علاقتي بي الحيط وطبعا
اكتشفت انو أخطر حيطه ممكن
تكون مرت علي شخصيا وعلى كل سوداني دي البتكون عادة
فاصله بين البيت .. وبين بيت الجيران .. يا اخ دي أخطر حيط في التاريخ من الله خلق البيوت ذاتا .. في الواقع دي ما مجرد حيطه زيها وزي باقي الحيط زي ما يفتكر كل الناس .. دي الفاصل الوحيد الوهمي بين الإنسان والحنان الأول لو الله
كاتب ليهو في الدنيا حنان ..
صحي مواد البنا ياها المواد .. بس دي حيطه لا يمكن تتنسي
.. اقلو اقلو يا اخ دي بتعني
طعم الجيره والنبي وصي بي
سابع جار .. خلي ده الأول .. َ ده
لو ما جابت الحيطه كلام تاني .. وبمرور الايام قامت بنت ليها بيت عديل كده وكونت اسره ..
شخصيا لقيت نفسي متلبس في قصايدي بعدد كبير من الحيط لو رصوها على بعض بتعمل ليها عماره ..
زمان ولدنا عماد احمد الطيب
غني لي اغنيه اسمها جاره يا جاره .. هسه اكتشفت ولأول مره انو الاغنيه دي فيها حيطه
.. ولا طله من السور .. لا تعرفي
زياره .. جمبي ومش جمبي ..
حبك ملك قلبي .. وعيوني محتارا .. قول واحد .. لقيت عندي اغنيه بتقول عارفك ما وعديتني وانا اتخيلت وعدك ساي .. ولحدي ما تصل .. منو
الكلم رمال الحي .. شوارع الحي
على بيوتا .. شلع من نور عيونك
ضي .. بقت حيطتنا مبسوطه ..
عليكم الله شوفتو ليكم حيطه
بتنبسط كما جن مني ساي ..
دقيقه دقيقه .. اقسم بالله عندي تاني اقلو تلاته حيط ..
ده غير الحيط الرماها الخريف ..
طبعا تظل أخطر حيطه في نظري ديك الكانت في بيت ناس اخوي الشاعر الراحل سعدالدين ابراهيم .. لما قال ليها .. من جيرنا الشمس بتشرق .. ومن جيرانا بجينا النور .. انا فتشت كتيره للفرحه .. وبيني وبين الفرحه السور .. شوفتو الحيط البيبجبو
ليها البنا زي ماقال ابو داؤود ..
ويرمي طوبة حب .. ويرمي طوبه محنه ..
ختاما صدقو حيطة الجيران دي كلاما تاني .. وياما زي ما قلت ليكم دي فتحت بيوت .. وبرضو
ياما فتحت جراح .. وكل طرف
مشي على اتجاه .. بس تظل
شاهد على كبرياء امه زي ماقال
نميري الله يرحمو .. وياما ياما
في حيطه مره تضحك .. ومره تبكي .. ومره تتحمل اسايا .. والما عندو حيطه .. يشوف لي
حيطه ..
