حسن فاروق
وصلنا مع مايسمى نقابة الصحفيين السودانيين مربع اللاعودة من الوحل المغروسين فيه، امس طالعتنا بتصريحات منسوبة لاحد قادتها ( وليد النور) بذكرني طه عثمان بتاع التجمع السابق البرمرم في كل الموائد، المهم بدأ تصريحه بكذبة ( نقابة الصحفيين : اكثر من الف عضو تلقوا دعما في ظل الحرب ومساع لتضييق الفجوة) ..
كذب صريح من هذا المسؤول اللي كشفوا بنفسه لما حدد فترة الدعم من (نوفمبر 2022 وحتى الربع الأول من عام 2026) .. واكمل الكذبة انه الدعم تم في ظل تحديات جراء أسنمرار القتال بين الجيش والدعم السريع، مع العلم انه فترة نوفمبر 2022 وحتى 14 أبريل لم تبدأ الحرب، فلماذا كذب وليد النور ونقابته؟ وإضافوا لتقريرهم خمسة او ستة شهور لاتدخل ضمن اوضاع الصحفيين في الحرب ؟ .
المسؤول الاجتماعي للخدعة اللي بتحمل اسم نقابة الصحفيين مشى مرحلة متاخرة في الكذب هو ونقابته لما حدد نسب المساعدات 30% للصحفيات و 20% دعم صحي وحدد برضو ( شفتو الثقة) انه ده تم في إطار سعيهم إلى تضييق الفجوة بين الجنسين، طيب دي 50% الخمسين التانية راحت فين يا وليد انت ونقابتك؟ ماهو كمان ماممكن تحدد نسب وماتحدد المبلغ المخصص للمساعدات، دي فهلوة زايدة عن اللزوم ياولي .. كم المبلغ قبل النسب، ومشت وين 50% التانية، اظن أكلها الدودو ..
الكارثة اللي نسفت حاجة اسمها نقابة اعتراف ابو اللول وليد النور انهم استلموا باسم الصحفيين الدفعوا تمن الحرب في أوضاعهم الماساوية أموال( فند) من منظمات اجنبية سماها وليد بدون خجلة ( متعودة دايما) فعادي عندهم، وسماهم منظمتين ( فري برس) و( الوكالة الأمريكية للتنمية الدولية) قالها النور: ( تمويل مساعدات الصحفيين جاء من جهات دولية) دي وقاحة ودي مانقابة ولايمكن تكون نقابة اللي بتتسول باسم الصحفيين، وتقبض باسمهم ( فند) ده فساد معلن ينسف وجود النقابة، الواحد بقى يخجل من الصور القاعدين في النقابة والصمت سيدهم لابفلعوا لابحتجوا لابسالوا ولا اي شيء واظن بقى واضح مين سيدهم.
ومع ذلك ماف ارقام يعني الود وليد عامل فيها شفاف خالص، وعاجز انه يقول كم دفعت هذه المنظمات عن طريق النقابة لمساعدة الصحفيين؟ كم يانقابة كم ؟ .
الضربة القاضية كانت في رسالة الشكر من النقابة قال وليد النور للمراسلين السودانيين العاملين في القنوات والوكالات العالمية وزملائهم في المؤسسات الدولية بالخارج .. علي شنو؟ قال على دعمهم المتواصل لزملائهم .. طبعا ماحدد طبيعة الدعم لكن واضح انها قروش، ماعرفنا دي ولا فراش بكاء .. ده تحقير للصحفيين الموجوعين، دعم زي ده شخصي وبغباء لايحسدوا عليه جوه النقابة طبقات، كنت بقول عنهم أصحاب الامتيازات وملاك الصحف ديل في الغربلة بره النقابة، والدليل ماقاله وليد النور. ومع ذلك كم دفع هؤلاء المرفهين من أعضاء النقابة المفترض مطلبية؟ الناس البتروج ليهم ديل دفعوا كم عن طريق النقابة؟ عايزين ارقام يامعلم .. كمان لو عايز تعمل ليهم دعاية وتميزهم فدي وضاعة منكم ياوليد، الصحفيين مهما كانت ظروفهم أكرم من انحطاطكم ده.
تسقط تالت
