خليها لي .. ع. هلاوي

( على لسان انسانه )

زعلانه .. اقعد أحنسا ..
فرحانه ..
اضحك اونسا ..
شن ليها غيري .. وغيرها
لي ..
خليها لي .. انا أمي يا الله
الكريم ..
روحي وعيني ..

لو دار تقوم .. انا بسندا ..
افرش رويحتي
وارقدا ..
انا سكرا .. وانا بمبرا ..
وأنا سبحتا ..
ونضارتا
جرعة دواها ..
وحبتا ..
وأنا سرها الطاوياهو
طي ..

ما بنسى في الزمن
الزمان
وكتين ابوي .. كان لسه
حي ..
كيفن بتسقيني
الحنان ..
وكيفن تخاف …
بالجد على ..
الليله هسه الدور
على ..
زعلانه .. اقعد
احنسا ..
فرحانه .. اقعد
اونسا ..

وأنا قهوتا .. وانا صاحبتا ..
تتعب ..
اكون انا راحتا ..
والراحه ايه .. غير راحتا ..
لو ماشه .. امشي اتكلا ..
لو قاعده ..
اقعد ااكلا ..
وبريدها
لامن تدعو لي ..
وبريدها
لما تقوم على ..

انا امي يا الله الكريم ..
خليها لي …

عبدالوهاب هلاوي …