عوض ابوشعرة
كلما افتح الواتساب الصباح ألقي ليك الترند انخفاض في قيمة الجنيه والناس تولول مستغربة ،،
اخر خبر قالوا بقي بي 10000 وزيادة ،،
وما عارف الناس بستغربوا علي ايه اذا كان كل وسائل الانتاج متوقفة والمنتجين اما نزحوا واما لجأوا لدول الجوار ،،
والداعمين ( بمقابل فزوا ) ،،
انتو قايلين العملة المحلية ممكن تثبت بدون تغذية دولارية تجيها من بره عشان تستعدل الميزان التجاري شويه ،، ؟
زيادات الاسعار ما حتقيف ،، ويمكن جدا السلع المستوردة يجيها يوم ما تلقي دولار يجيبها ،، وفي الحالة دي ممكن جدا اصحاب محطات الوقود يقلبوها مطاعم ،،
وكت ده كلوا حاصل ،، الجنيه حيجيب عافية من وين ،، ؟
الحل الوحيد لثبات الجنيه في الاوضاع الحالية انو الناس تبطل تاكل وتبطل تتعالج والعاملين في الدولة يشتغلوا مجان ،،
غير كده انا لو صحيت في يوم من الايام ولقيت الجنيه انخفض ألف جنيه حته واحده ما حأستغرب ،،
في ظل ركوب راس البرهان فأي انسان جعلته الظروف محبوس بين بنادق الكيزان وسكاكين الدواعش عليه ان يتوقع الاسوء دائما في كل يوم حرب اضافي ،،
وقلبي مع أي مواطن جعلته ظروفه الخاصة اسير في جغرافيا وطن محتل ،،
ولا حول ولا قوة الا بالله ،،
