بقلم: وفاء عبد الغفار – بنت السويس – نائب رئيس مجلس إدارة جريدة موطني
يا سوايسة يا طيبين.. هو إيه اللي بيحصل؟
فنانة عربية أصيلة متزوجة من المحامى المصرى ابن قرية فزاره – مركز القوصية – محافظة أسيوط , المحامى / محمد عثمان نعمان من عائلة الوسية فى 27 / 8 /2017 و مقيمة بمصر بتحب مصر من قلبها، جت لحد السويس عشان تفرح معانا في عيدنا القومي، غلطة لسان وقالت “قناة السويس” بدل “محافظة السويس”، نقوم نعمل عليها حفلة ونقول “غريبة” و “مش مننا”؟
عادي جداً، كلنا بنتلخبط. هو مين فينا ما اتلخبطش في اسم شارع أو مكان؟ هل معنى كده إنها مش عارفة قيمة السويس؟ جنات اللي غنت “يا أحلى اسم في الوجود يا مصر” وغنت لمصر أكتر ما غنى ولادها نفسهم!
عيب لما نقول عليها “غريبة”. جنات مغربية مصرية، والمغرب ومصر أشقاء، دم واحد وتاريخ واحد. ويكفينا فخراً إن فنانة من بلد شقيق بتعشق تراب بلدنا لدرجة إنها تعتبر نفسها بنت مصر، إحنا نتشرف بأي حد يحب بلدنا ويغني لها.
وبعدين إيه نغمة “مش ابن البلد” و “الغريب” اللي طالعة اليومين دول؟
“رُب أخ لم تلده أمك” .. هو ده اللي اتربينا عليه في السويس، بلد الغريب اللي كانت حضنها مفتوح لكل المصريين من كل المحافظات أيام التهجير.
جايين النهاردة عايزين تقسموا البلد نصين؟ نص يقول إعلامي فلان ونص يقول لأ الغريب؟ طب خليتوا إيه لأعداء الوطن اللي نفسهم يشوفونا متفرقين؟
السويس طول عمرها بلد الفدائيين اللي دافعوا عن مصر كلها، مش عن شارع في السويس. بلد بتلم، مش بتطرد. بلد بتحب اللي يحبها.
كفاية هجوم، كفاية تكسير مجاديف. خلونا نفرح بيومنا. اللي بيحب مصر أهلاً بيه في السويس، سواء كان من السويس أو من القاهرة أو من المغرب، كلنا ولاد مصر وولاد الوطن العربي.
شكراً جنات على حبك لمصر، ونورتِ السويس، بلدك التاني.
وفاء عبد الغفار
بنت السويس
كلمة حق في حب جنات.. ووقفوا هجوم قناة السويس
