عباس العشاري يكتب : هل فيديو مخازن الدقيق في الخرطوم حقيقي؟ المواطن منتظر رد رادع
هل فيديو مخازن الدقيق في الخرطوم حقيقي؟ المواطن منتظر رد رادع
بقلم: عباس العشاري
هل الفيديو المتداول حقيقي؟ أجهزة الأمن تقبض على أصحاب مخازن في الخرطوم يخزنون الدقيق والمواطن جعان
انتشر في الساعات الفاتت فيديو بيتكلم عن إنو أجهزة الأمن في الخرطوم قبضت على أصحاب مخازن كبيرة مخزنة فيها أطنان من الدقيق والسلع الاستراتيجية، والمواطن المسكين واقف في صف العيش بالساعات عشان لقمة. لو الكلام ده صحيح، والفيديو ده حقيقي، تبقى دي مصيبة كبيرة.نسأل سؤال واضح وصريح
المواطن المغلوب على أمره ده يتوقع شنو من الممارسات دي؟ مواطن طالع من حرب، مشرد، تعبان، ما لاقي حق المواصلات، يجي يلقى ناس بتخزن قوتو عشان تبيعه بالغالي بعدين ده ما اسمو تجارة، ده اسمو خيانة للوطن والمواطن.
هل الفيديو ده صحيح؟ هل فعلاً تم القبض على المخازن دي؟ نحن بنسأل الجهات الرسمية، منتظرين بيان واضح يوضح الحقيقة للرأي العام.ولو كان صحيح، نحن كمواطنين بنطالب بقرارات صارمة ورادعة.
ما دايرين كلام ناعم ولا غرامات ساي تمشي وتجي. دايرين قرارات تبلّي القلب:
اولا مصادرة كل السلع المخزنة دي فوراً وتوزيعها للمواطنين بسعر التكلفة أو عبر المحليات.
ثانيا إغلاق هذه المخازن نهائياً وسحب التراخيص من أصحابها.
ثالثا محاكمة علنية وأمام الملأ، عشان أي زول تسول ليه نفسو يحتكر قوت الناس يشوف مصيرو شنو.
لازم صورة الخونة والجشعين والضعاف النفوس البيتاجروا بلقمة المواطن تتوضح قدام الناس كلها.
المواطن السوداني صبر على الحرب، صبر على التشريد، لكن ما ممكن يصبر على زول يسرق لقمة عيشو وهو حي.ننتظر رد رادع من السلطات.. والمواطن منتظر يشوف الحق بيرجع كيف.
