عبد الاله ص
شريف الفحيل اليومين دي شغال كِشيح حِلل تقيييل الجنا لابس فنيلة حمالات ويكشح في الحِلل مُنطلق ( عريان ملط ) يكشح برضو في الحلل بيتمكيج أو عامل ماسك ( خيار ) وفقوس كمان بكشح في الحِلل .. ببكي وبجعر بي حُرقه بكشح في الحِلل .. النصيحه الزول ده لو إستمره كده لحدي نهاية الشهر مستحيل تفضل حَله في الحِله ( بتجقجق ) في النار .. ياخي الزول ده الملاح البايت في التلاجة من سنييين ودنيين كشح حلتو وقال الفنان نادر خضر كتلو فنان بي صلعه وجنو يسف تُنباك عماري طبعاً بسف دي مني نظام ( تُوم وبهار وتمومة شمار ).. إذا خلاصة القول ااااي زول بصوت ( حميدتي الهالك ) عندو حَله إن شاء الله حَله ( سخينه ) مشتركة مع الفحيل ده زمان يكرب قاشو وينتظر ( رشو ورشاشو ) العجب ناس حلل ( الكمونية ) ديل يلحقوا في الخاص سرييييع يحسمو معاهو فوضى الكشيح المامُرشد ده لانو أخير ترقد ليهو في الخاص ظريف ولابس ( خفيف ) بدل يرقد ليك ( بالتقيل ) في العام ياحمام .. المهم في الموضوع شريف شغال يتمكيج ويمسح في مكياج الفنانيين ماخلى ليهو ( فاونديشن ) حايم لي فنان مخبي وراهو ( سر ) يعني الزول ده شغال ( تجريف وتنضيف ياظريف ) تصبح الصباح تلقى نفسك قاعد ملط بدون مساحيق ولا مكياج ولا زيف يعني بخليك زي الصريف وسط ( الخريف ) والذين لا يعرفون معنى( الصريف ) هو جدار من القش لا يحتمل المطر الشديد وبمناسبة ( القش والرش ) نرسل من هنا رسالة لي بت الشريف نقول ليها أبعدي من التحالفات الضد شريف لانو ( الشرف غالي ) وماتلعبي بالنار معاهو وأبعدي كمان من ( حمادة مُكابسات ) لانو الآن تحت نيران ( القذف ) لذلك استخدمي الساتر أو ( الواقي ) عشان الحكمة بتقول ( الحِمل والولادة متباريات أقصد الفضيحة والسترة متقايدات ) والفحيل في الردم مااا عواف ) بعدين انت حلتك بتكون مسبكه بي تومه ( وشماره ) ولحمته ضاني ( دعول ) وبصلته محمره تقول ( يامرقتي ) دي علي الايمان دفقته ( والقبر ) لذلك ضاري على حلتك عشان تنجض وتتسبك … بعدين الشريف ده كان ماعندك حله بسبك ليك حله بي إسمك وبكشحه
أخيراً شريف طالب بقناة تدفع ليهو قروش عشان يكشف المستور انا من جانبي بدعو كل محبي نادر خضر يدقوا ( شيرنق ) وترسل المبالغ لي ( الشريف ) يفتح لينا لايف مدفوع ( القيمه ) والعزيمه ويدق الصفائح ويطلع الفضائح لانو أنا شخصياً في هذه المعارك ( الشريفه ) لن اطلب اي تهدئة لهذه الطلعات الصاروخية الفحيلية البالستيه المركزة والتي أصابت عدة مواقع محببه لنا لذلك نطالب بالمزيد من التصعيد ونهمس في أضان الفحيل ( الشريف مبسووووووط منك ) ..
إخيراً أردم أردم ياكحيل …
عري الخونه وأفضح ديل …
