السكوت والصمت إشتراك في الجرم وتواطؤ .. كلهم مجرمين والذباب أجرم منهم عمداً كان أو جهلاً أو فش غبينه.

هشام علي ود قلبا
قصف مستشفى الضعين
قصف مستشفى الدلج
قصف المصلين في الدبة
قصف .. قصف .. قصف
قصف من هنا ومن هناك ..
كلها جرائم لأنها ضد مدنيين .. ما بتفرق أسامي الإرتكبوها ولا نوع السلاح الأستخدموه ولا ألوان لبسهم وألوان اليافطات الواقفين تحتها .. تعريفهم واحد وأسمهم واحد (مجرمين).
تتناول قذارات الحرب دي يتلموا فيك مرة من هنا ومرة من هناك الذباب معدوم الضمير المليان غباين وأحقاد ما بتنتج إلا مزيد من القصف البدفع تمنه المدنيين .. تسكت برضو يتلم فيك نفس الذباب معدوم الضمير بسؤال بجمع كل قبح وحقد وغباء وجهل الدنيا (ليه ما بتتكلم عن التانيين؟) ، وشلالات من التبرير والشرعنة لسفك الدم والخراب ..
وما مهم الذباب يقول العاوزه ..
الله لا ينور بصيرته ولا يصحي ضميره ، والجمرة الواطينها المدنين تصله والوصلته قبل كده يرجع يطاها تاني وتالت لحدي ما نعدمه أو يعدم هو قدرة التبرير والسؤال القبيح ..
عشان كده ما بنتناول قذارات الحرب اليومية ، لكن بنقولها صرييييحه وواضحه ، السكوت والصمت إشتراك في الجرم وتواطؤ .. كلهم مجرمين والذباب أجرم منهم عمداً كان أو جهلاً أو فش غبينه.
اللهم أبرأ إليك من كل نفس بريئة أزهقت ودم سفك وعرض أنتهك ومال سُلب وآمنون شردوا.