غايتو الدق الادقاهو أبناء جيلنا والاجيال السبقتنا ماحصل .. الأسلوب أو الطريقه الأولى في التربيه ونحن صغار اننا نندق ..
ايوه نندق بي سبب أو بدون سبب .. اقل حاجه يجيك كف طاير.. مرات بتكون ما فاهم السبب ذاتو .. وانت ما تقدر تفتح خشمك .. تاكلو ساي وتلبد .. الغريب انت ذاتك لو مرو عليك كم يوم ما اتهزأت ولا اندقيت بتسأل روحك .. يا ربي الدقاقين وووين .. وياريت لو
الدق في البيت بس .. في المدرسه برضك تتجلد زي السلام عليكم في أبسط غلطه .. نحن من جيل شيل اللحم وأدينا العضم لما طلعنا لا عضم لا لحم ولا مصارين ذاتو ..
كف واحد ناولني لي استاذ انجليزي كان قرب ينهي كل مشواري ويحولني لي فاقد تربوي .. من الكف داك مرت سنين ودنين ولي هسه لما اسمع
زول برطن ساي بحك جضمي .. الجميل اني في فتره مبكره من حياتي اكتسبت خاصية عدم الخوف من الدق .. نبوغ مبكر وكده .. أمي وخالي عثمان الله يرحمهم تعبو من دقي لما ايدهم فترت وانا ولا على ..
وفي النهايه اتوصلو لي قناعة انو الود ده تور ساكت كان دقيتو كان ما دقيتو كل واحد .. مساكين ما كانو عارفين في حاجه اسمها حنان .. كان من الممكن تخلي الزول يستعدل ويمشي زي الطلقه .. لكن يجيبو الحنان والمنطق من وين ..
اهو نفذو مشروعهم بحسن نيه ونحن طلعنا ناس عضلات سااااي .. تبش ..
الغريب زمان مرات بكون الدق من طرف .. يغلط واحد يدقو الكل .. على قرار .. وذنب جره سفهاء قوم .. فحل بغير جارمه العذاب .. في المدرسه ممكن يدقو الفصل كلو عشان بس في واحد هرجل .. هسه دي يقولو فيه شنو …
بي اختصار جيلنا والاجيال السبقتنا كانو ناس جلد سااااكت .. بعض مننا كان بيتعلم يردف أكثر من يتعلم من التعليم ذاتو َ..
عرفتو سر العقد الدخلتنا من زمان وما مرقت مننا لي هسه أسبابا شنو ..
عرفتو ليه نحن امه ما بتعرف تحسم خلافاتا الا بي الضرب ليه ..
عرفتو ليه من أعظم إنجازات الانظمه السياسيه عندنا ضرب الشعوب ليه .. ماهو كلو من كف استاذ الانجليزي الخلي كل شعب .. ومع قيام أول حكومه .. أول حاجه يعملا الشعب يحك جضمو .. وقبل يسأل عن حريتو والخدمات ..
الطريف ده ذاتو الخلي كل حبيباتنا يفترو علينا ويخوننا ونحن نبكي ونغني ليهم ..
تغلطو انتو يا أحباب .. نجيكم
نحن بي الأعذار …
يا أخ ملعون أبو ده جضم ……
ع. هلاوي
