لازم تعرف إن أبوك وأمك
صحتهم تعبت ومابقوش زي الأول،مش معقول كل ماتتكلم معاهم مفيش عندك غير إنك تعبان وقرفان ومهموم ومش طايق نفسك ولا اللي حواليك وكل حاجه في حياتك متقفله وسودا وكلها مآسي، إنت عارف إن أسلوبك ده في الكلام مع أبوك وامك اللي كبروا في السن هيكون أثره إيه عليهم ،اقولك اللي إنت مش واخد بالك منه..أو واخد بالك منه وبتستعبط ، زيادة آلامهم واوجاعهم وامراضهم ويمكن لا يستطيعون النوم من كتر التفكير فيك ،مش معنى كلامي إنك ماتتكلمش معاهم في اي حاجه مضايقاك..لأ..قل وفضفض معاهم
ملكش غيرهم لكن مش معقول كل كلامك معاهم مافيش فيه موضوع يفرحهم ويسعدهم،مش معقول أبدآ حياتك كلها مفيهاش أخبار جميله ومفرحه، ابوك وامك كبروا في السن وصحتهم في النازل و صحتهم مابقتش تستحمل زي الاول ،شوف كم الأدوية اللي بياخدوها لكل الأمراض، خليك ذكي ولماح وتخير موضوعاتك وانت بتتكلم معاهم..لا أنا عاوزك راسم النكد على طول ومفيش غير مآسيك ولا عاوزك ممثل نازل تمثيل سعادة وجواك عكس كده، خليك متوازن وأعلم أن حديثك عن سعادتك هو قمه سعادتهم وراحتهم النفسية
وحديثك الدائم المستمر عن مشاكلك هو قمة تعاستهم ودمارهم النفسي والانفعالي وتعب صحتهم، حاولوا تسعدوهم وتفرحوا قلوبهم شوية في اليومين اللي فاضلين لهم على وش الدنياقبل مايكونوا ذكرى في كتب حياتكم بعد كده وساعتها تقولوا ياريتنا كنا اسعدناهم…. [ماقيمة قُبلة تطبع على جبين ميت]
#مجرد _خاطره
ا.د.فتحي الشرقاوي
أستاذ علم النفس بجامعة عين شمس
