طالما الكهرباء بقت “سلعة” وبيع وشراء وتكسب في حياة المواطن ، موش مفروض أقل شيء يكون في أدب وحياء في البيع والشراء والتكسب ده ؟؟

هشام علي ودقلبا
الكهرباء بقت “سلعة” ضرورية زيها وزي الموية والدقيق والوقود وغيرهم ما رفاهية وكماليات .. بل أحتمال أهم منهم ، بدونها الموية ما بتوصل ولا الدقيق ببقى عيش ولا الوقود بوصل تنك العربية او بوصل المولد عشان يطلع كهرباء .. أهم منهم لأنها بتتدخل تدخل مباشر في حياة مريض في غرفة عمليات أو عناية مكثفة .. وقس على ذلك.
آسف جداً على تسمية الكهرباء “سلعة” ، لكن ده الأمر الواقع ، الجميع عدا المواطن بتعاملوا معاها غصباً عن المواطن كسلعة ، وأولهم الحكومة – ده لو جاز نسميها حكومة – الملزمة وفرض عين عليها تقدمها كخدمة من أبسط حقوق المواطن في أي دولة محترمة بتحترم مواطنها ..
طيب ..
طالما الكهرباء بقت “سلعة” وبيع وشراء وتكسب في حياة المواطن ، موش مفروض أقل شيء يكون في أدب وحياء في البيع والشراء والتكسب ده ؟؟
يعني مثلاً ..
بنوك كتيرة وأولها بنك الأدخار (الحكومي) دخلوا في سباق البيع والشراء والتكسب من “السلعة” السوقها حار دي .. بدينوا المواطن بشروط وضوابط يدوه كهرباء بديلة .. المواطن المستوفي الشروط والضوابط بدفع مقدم ويدينوه طاقة شمسية ويسدد الباقي على أقساط .. وطبعاً مع أرباح دسمة.
وهنا عندي سؤالين :
– ليه (البنك) بلزم المواطن – كراعو فوق رقبتو – يشتري الطاقة الشمسية من شركة تابعة للبنك أو بمعنى أصح البنك “مظبط” أموره مع الشركة دي ؟؟
المواطن كراعو فوق رقبتو .. يقبل بجودة او عدم جودة منتج الشركة دي !!
كراعو فوق رقبتو .. يقبل بمدة وشكل الضمان أو مافي ضمان زاتو !!
كراعو فوق رقبتو .. يقبل بوجود وجودة الصيانة ولا مافي صيانة ، وهل في قطع غيار متوفرة ولا شختك بختك ساي !!
لا من أدب ولا أخلاق ولا حياء البيع والشراء إنك تبيع للمواطن “الجمل وتنقي قرادو” ..
– تاني سؤال ، وده الأهم ..
طالما البنوك دي قروشها راااقدة عيني باردة عليهمو، ليه تدين في كل حي تسعة عشرة مواطنين فقط ؟؟ ليه البنوك ما تمشي تدين الحكومة وشركة الكهرباء ، وشركة الكهرباء بقروش التسعة عشرة ديل تعمل محطة مركزية تخدم الحي كله ..
وكده أضمن للبنوك مافي مواطن (متعثر ، مات ، سافر ، قفل تلفونه ، وافتحوا فيه بلاغ وسكوه واسجنوه) .. قروش البنك مضمونه ، الحكومة تتحصل من المواطنين وتسدد للبنك قروشه ..
صعبة دي ؟؟
أيوه صعبة ، وصعبة جداً كمان ..
لأنه الطلبين في شكل سؤالين الفوق ديل جزء بسيط من تفكيك منظومة من أخطر منظومات الفساد والإستغلال الشغالة في البلد في “تناغم” تام.
دي رمية حجر في مستنقع (الكهرباء البديلة) .. ومدخل لمستنقع (الكهرباء التقليدية) أس الفساد والإستغلال الأكبر والأنتن.