هشام ودقلبا
الواحد يغيب عشرة يوم من فيسبوك ، كان قبلها بتشتم وتتجاب سيرة أهله كلهم إذا كتب “س” من “السلام” ، ويجي فجأة يلقى الكل شايل الصفقة فوووق بكلام محمد بن سلمان وترمب عن السلام ووقف الحرب .. زول واااااحد سأل السؤال الفرمالة (سلام مع منو؟) مافي !!
– الجنرالات ، نرحب ..
– الجنجويد ، نرحب ..
– الكيزان ، نحرب .. ومعاها يد بيضاء (ما عارف اليد البيضاء دي حيجيبوها من وين)
– الحركات ، نرحب ..
– صمود ، نرحب ..
– تأسيس ، نرحب ..
– البلابسه ، نرحب .. ومعاها (إح)
– فتوات التيك توك ، نرحب .. (فتوات ما فتيات)
– صحفيات بنكك ، نرحب .. (ويعلوا صوت اشعارات التلفون البتنبه بوصول إشعارات البنك)
– دلاليات الصحافة الفي قطر ، نرحب .. ومعاها فنسه وغزة كوع ..
– كامل إدريس الرايح ليه أسبوعين مافي زول سأل منو ، والزول الوحيد السأل منو فتحوا فيه بلاغ ، برضو نرحب ..
– لايفبوبيز الشكل في الدولارات ، نرحب ..
– متحرك غبيرة ، نرحب .. على طريقة ( لو كنت قادر أقبل كان كسرت رقبتك) ..
– ياخ حتى القونة حكامة السجمان الدعت على أي زول يجيب سيرة السلام فجأة بقت تغني للسلام ..
– أما بتاع “لا جدة ولا جدادة” ، تممممم قاطع النفس تماماً ..
كللللهم برحبوا بالسلام ووقف الحرب على يد ترمب ومحمد بن سلمان .. ونحن ناس (اوقفوا الحرب) سنتين ونص طلعنا الكاكا الكعبين الوحيدين في البلد دي ، وإحتمال يفتحوا فينا بلاغات جديدة !!
#محن
