اسمح لي يا حبيب استخدم الفيديو بتاعك ده وارد عليه
يا ضابط السجم ودلقان العسكر لازم تتأدب وإنت بتتكلم مع المواطن الصرف عليك دم قلبه ابتداء من تمن ورق الاستمارة القدمت بيها لدخول كلية الشرطة لحدي ملابسك الداخلية اللابسهم وقت سجلت المقطع ده .. تلفونك البتسجل بيه قلة أدبك على سيدك المواطن ، المواطن هو الدافع تمنه.
المواطن البتقول عليه عفن ده ، هو الصرف عليك وقراك ودربك عشان تبقى ليك قيمة بين الناس وينادوك يا سعادتك .. لكن مرمي الله ابداً ما عنده سعادة ..
الشرطة الجاي تتدسدس وراها عشان تقل أدبك جهاز مدني اتعمل عشان يحمي المدنيين ، ما عشان كهنة بوت نكرة زيك يستغل اسمها ويقل أدبه على المدنيين ويهددهم ..
بتهددهم بشنو ؟؟
بالكاكي والعلامات والرتبة اللابسهم ديل ؟؟
الكاكي والرتبة والعلامات المواطن اللبسك ليهم .. جاي تهدده بحاجة حقتو هو الأداك ليها ؟؟
وإنت منفوخ ليه ؟؟
أيوة أنا مواطن ومن حقي أسألك ، إنت شغال عندي أنا ولا شغال عند زول تاني ؟؟
أسألك أي سؤال يعجبني ولا على كيفك .. وتجاوب غصبا عنك ..
أرفع راسك انا بتكلم معاك ..
أنت كنت وين يا سعادة الهنا لما أنا صحيت صباح 15 أبريل لقيتك إتبخرت ؟؟
أنا المواطن العفن ده قريتك ودربتك واديتك رتبة وعربية ومليت ليك تنكها بنزين عشان تحميني ولا عشان تفحط بيها تخليني أعزل للجنجويد ؟؟
أيوة أسألك وأحاسبك وإنت تقيف قدامي بأدب وتخت عينك في الارض وانت بتجاوب ..
يا سعادة الهنا ، ذرة حياء يا كافي البلاء ما عندك ؟؟ بكل جليطة وبجاحة بتسأل المواطن كان وين ديسمبر 2024 و 2023 ؟!!؟
تعال اوريك ..
نصنا نزح .. لأننا للأسف جبناك دوعلناك وكبرناك وشحمناك واديناك كاكي ورتبة وسلاح عشان تحرسنا ، ومن أووول طلقة قلعت الكاكي ودفنت الرتبة وخليت سلاحنا في القسم وفحطت .. كمان ليك عين تسألنا كنا وين ؟!!؟
والنص التاني .. قعد تحت الدانات والقصف لا حول لهم ولا قوة الا بالله ، وجزء كبير من القعدوا شالوا سلاح وقاتلوا الجنجويد .. وإنت جيت لقيتها باااارده وداير تعمل ضكر وتتنفش فينا ؟!!؟
الشرطة رغم انه سوادها الأعظم ياهو فصيلتك الواطية دي ، لكن برضو فيها شرفاء قطع شك إنت ما منهم ، ولا عمرك حتشوف الشرف بعيونك .. وعاجلا ام آجلا الشرطة حتتنظف من أي عفن وسخ وضيع زيك ..
إنت واجعاك ومخوفاك المواكب البتهدد عرش أسيادك .. نحن موضوعنا ما الشرطة كانت وين .. لأنه الطير في السماء عارف انها كانت وين .. نحن موضوعنا إنت جيت فضيت الموكب لييييه ؟؟ وبياتو حق ؟؟
وتعال النوريك الوعيد ما التهديد .. باكر أسيادك البتشتم المواطن عشانهم بمشوا ، والحساب حيكون بالقانون ما بقلة الأدب ، قانون لكن بدون ذرة رحمة واحدة .. وأنا إن بقيت حي دنيا ، أوعدك أني حأكون أحرص خلق الله أنه المواطن يسترد منك الرتبة والعلامات اللابسها دي ، وأوعدك حتقضي وقت ما قصير من عمرك في السجن إحتمال تتأدب ، وكله بالقانون.
أما (حشرات) دي فالرد عليها ما هنا .. وقرض على كدة
#مافي_مليشيا_بتحكم_دولة
#العسكر_للثكنات_والجنجويد_ينحل
