طبعا في ناس متخيله انو قصة انهيار الدولة دي ونسة ساي ،، وفي ناس متخيله انو وجود جيش معناها في دولة ،،

عوض ابوشعرة
وفي ناس تانين بتصوروا الانهيار ده بحصل زي انهيار المباني ،، ( وردلب كده ) الدولة بتجي واقعة ،،
الدولة دي ياخونا فعليا بدت الانهيار وماشة بسرعة شديدة و ده ممكن نشوفو في الاتي :
1/في رئيس وفي حكومة لكن مافي دولة كمفهوم ومؤسسات .. المؤسسات كلها تحولت لي ادوات امنية ..
يعني وزارة التربية والتعليم بتسحب تراخيص مدارس بتقول انها متعاونة !!!
جامعة الخرطوم بتتزور فيها الشهادات ..
الدهب بتهرب بدون رقيب او حسيب ..
محاميين كيزان بتلمو يسحبو تراخيص محاميين مطالبين بالسلام ..
2/فقدان السيادة الوطنية ..
واضح جدا انو البرهان عشان ياخد اي قرار محتاج يسافر لي كم مكان بالاول ..
3/احتكار العنف ..
جيش ضعيف مع عدد مهول من المليشيات .. مافي ضرورة نشرح المشروحات ونوضح الواضحات ..
4/انهيار الاقتصاد..
انهيار الجنيه مع زيادة التضخم وتوقف معظم قطاعات الانتاج مع عدم توفر فرص عمل وبالتالي فقر شامل ..
اقتصاد قائم على مساعدات المغتربين والتهريب والجبايات ..
الدولة ذاته بقت عايشة على قفا المواطن ..
5/ عدم وجود عقد اجتماعي ..
الدولة لا بتحميك ولا بتقدم ليك خدمات .. بتديك جواز سفر وبتفكك عكس الهواء .. ده لو ما قالت ليك استنفر ..
العلاقة ما تعاقدية .. علاقة قسرية .. وكدي جرب افتح خشمك طوالي بكبسوك بي تهمة متعاون ..
6/تفكك النسيج الاجتماعي..
خطاب كراهية بين المكونات وعنصرية واضحة وظاهرة حتى في سلوك الحكومة نفسها تجاه المواطنين..
ده غير وسائل التواصل الكلها نبذ وشتيمة ..
نزوح باعداد كبيرة جدا .. نزوح قسري طبعا ما اختياري ..
7/انهيار الخدمات العامة..
كهرباء .. موية .. صحة .. تعليم .. امن .. بنية تحتية مدمرة ..
8/ دولة امنية من غير دولة ..
اعتقال وتعذيب وغياب للقانون وعدم استقلال للقضاء .. الاجهزة الامنية مركبة مكنة الدولة ..
9/الهجرة والنزوح الجماعي ..
نص السودانيين ما بين معسكرات النزوح الداخلي او اللجوء الى بلدان مجاورة ..
10/استقرار هش ..
مافي حرب شاملة ..
لكن ماف سلام .. مافي اعادة اعمار .. مافي افق لي حل قريب ..
ده كلو كده على بعضو اسمو الانهيار او الموت البطئ للدولة ،،
طبعا الطريق لتفادي الانهيار الشامل طريق صعب لكن موجود ببدا من الاعتراف بالانهيار ثم ايقاف الحرب مرورا بالحكم المدني ثم الدستور والعقد الاجتماعي ثم التداول السلمي للسلطة والاستقرار والانتاج والتنمية ،، بس ده كلو يظل امنيات طالما كانت الحرب حرب جبناء يقايضون سلامتهم الخاصة بسلامة الوطن ،، والمنتظر الاسلاميين يوقفوا الحرب تفاديا للانهيار حينتظروا كتير ،،
حقك تقلعوا ،، ،،