يمة ادينى طرقة.. انوار سليمان

نحن ربات البيوت والامهات فى ظل الوضع اللاهث الذى تفرضه الظروف ، ينتهى اليوم بين العمل ورعاية الابناء واعباء المنزل لا نكاد ننتهى من هذا الا واسرعنا الى ذاك فى سباق محموم لتوفيق اوضاع الاسرة الحياتية وتوفير قدر من الرفاه والسلام ،اتبعنا فى ذلك خطط واسترتيجيات لتوفير الوقت والجهد والمال..فكان ان زرعنا لنا فى كل مكان مصدر ..زى مصادر الصحفيين و رجال الامن والمخابرات..فانا مثلا فى الحى عندى مصدر فى فرن الحى قبل ما اتحرك للعيش بضرب تلفون بسالو العيش طلع ولا لسه؟..فى زحمة ولا مافى ؟..عندى مصدر فى اقرب طرمبة بنزين لينا قبل ما اتحرك بضرب شغالين ولا ما شغالين؟ خصوصا ايام مواكب الاحياء..عندى مصدر فى الجزارة اهااا الليلة عندكم لحمة مفرومة؟
ولا نجلى الفكرة..ست الكسرة ..بتاعة الصيدلية ..بتاع الخدار ..اى اى محل حرفيا يعنى..اهم مصدر عندى بتاع الغاز….دة بقى اهم واحد فى ديل..المهم ونحن غازنا قاطع ليهو كم يوم انبوبتين وحاتكم فاضيات ..بضرب ليه تلاتة مرات فى اليوم الصباح والضهر والمغرب. ترن ترن ترن الووو اهاا الغاز جا
..لسه والله
..الغاز جاء
؟ ما جاء والله..جاء؟
.ماجاء ..جاء ؟
ما جاء..
امس الضهر تررن تررن ايوة يا عبدالله اهااا جا ؟
..اى جاى فى السكة ..
اجى يعنى؟ سريييع هوا..تمااام ..ورروررر ورر دورت العربية فووووو الطرمبة ..نزل لى الفاضى ختيتو قدامى قعدت لى فى مصطبة وعينى للعربية جاية تتهادى ..ناس الطرمبة اتخلعوا قال لى يا اختى انت جيتى قبل الدفار عديل..قلت ليهو الله اكبر عليك يااخ.. ما ناقصاك انا كتر خير المصدر ..مشوا ينزلو فى الفاضى ويرصوهو ..فى الاثناء دى جاء عمك كبير كدة ياهو الفى الصورة دة..قعد جنبى فى المصطبة منتظر بقينا اتنين قلت ليهو يا عمى انبوبتك وين نختها جنب حقتى دى..قال لى المسافة دى تعال نونسك انا بسالك وانتى جاوبى نشوفك شاطرة ولا سااى..
قال لى الحج ورمضان والمولد بجتمعن فى شنو ؟ بعد تفكير قلت ليهو والله غلبنى ياحاج ماعارفة قال لى فى الاهلة يا بتى .
.طيب تانى السمكة والموبايل والكورة بشابهن فى شنو..برضو فكرت قلت ليهو ماعرفت قال لى فى الشبكة يا بتى.
.عمو طلع دمو خفيف شديد وانا خجلته قلت ليهو فى محاولة لتخفيف البلادة حقتى دى والله يا عمو يا حليل الفوازير دى كان زمان حبوبة تقولها لينا بعد القصة الكاربة وقبل ما كل واحد فينا يلزم عنقريبو، والحوش مرصوص عناقريب.. وقت العصر بنرش الحوش بى موية البلاعة ،ونقشو، ونجر العناقريب من قعر الحيط نملا بيهم الحوش، ونفرد اللحافات، ونطرح الملايات، ونقعد فى الواطة نتفرج فى التلفزيون …ما بنقعد فى العنقريب المفروش عشان نقول يبرد لينا ويبقى صاااقط..قال لى يااااحليل الزمن يابتى قام على حيلو ووقف قصادى ومد لى يدو قال لى يا حليلو دة زمن يمة ادينى طرقة..لمن تجى من بره هفتان وتلقى امك مولعة صاج الكسرى وتعوس ..تشم ريحة الطايوق على الصاج وهى بتعوس تقعد جنبها فى البنبر تقول ليها يمة..يمة..يمة ادينى طرقة..انا هنا العبرة خنقتنى قلت ليهو تجيب كورية طلس فيها موية وتفرش فيها الطرقة وترش فوقها حبة سكر ..تاكل الطرقة وتصنقع تشرب موية الكسرة بالسكر ..ما احلاها..نسينا موضوع الغاز ..والناس بدت تكتر عبر المصادر..قال لى نقوم قبل الغاز يكمل ..قلت ليه كدى اقعد شوية انت من برى هنا؟ قال لى تعالى احكى ليك عن برى..برى دى مكانها الاصلى محل قاعة الصداقة هسه؛ وكانت زى جزء كدة من توتى واسمها بر توتى..لمن قرروا يعملو الخرطوم مدينة ادارية قاموا نقلوها شرق قضيب السكة حديد بره ..بقت كل شوية تبعد شوية شوية لغاية ما استقرت فى حتتها الحالية دى . وبقت برى…برى ابو حشيش كان مكان معرض الخرطوم دة ..وناس برى الاصيلين محس ..وفيهم جنوبيين ونوبة ..ناس برى ديل الناس الوحيديين الما اتلخبطوا مع اى اجناس اجنبية..هم سودانيون اصليين ..لا فيهم مصريين ولا شاميين ولا اقباط ولا حلب لا جدهم العباس ولا الخليفة المنصور..لا انصار ولا ختمية ..السبب برى المنطقة الوحيدة فى السودان ممنوع الاجانب يسكنوا فيها بامر الحاكم العام..لانو ناس برى شغالين فى الجيش والسكن الانجليزى اللى هو البركس .عشان كدة طلع الحاكم العام طلع القرار دة .. لانهم كانو شغالين مع الانجليز والانجليز بثقوا فيهم شديد عشان كدة عزلوهم لكن ناس برى كانوا فى قمة الوطنية وعندهم اعتداد كبير بنفسهم فكانت تنشاتهم تنشءة منفتحة .تعرفى يا بتى قوون برى منو كان ؟ ..حارس الفريق بتاعهم كان خواجة انجليزى اسمو تيماك….قال لى شوارع الخرطوم دى كانت اسماءها انجليزية وتركية .. شارع القصر كان اسمو شارع فكتوريا..وشارع النيل اسمو كتشنر.. وشارع الجامعة اسمو شارع غردون..والبرلمان اسمو شارع ونجت…وفى تلاتة شوارع اسماءها كانت تركية شارع الجمهورية كان اسمو شارع السردار..والبلدية كان عباس..والسيد عبدالرحمن اسمو السلطان عبد الحميد….والله نضمنا سماحة نضم وكل ما يجى يقوم اقول ليه عليك الله اقعد شوية ..احكى يا عمى..لمن زهج قال لى الغاز الغاز يا بتى الغاز بفوتنا ..المهم انا لى يومين والعبارة الحنينة ما فارقت لسانى وخاطرى… يمه امى..يمة ادينى طرقة ..