برة ….برة

وبرة بضم الباء هو لقب وجدنا الناس يطلقونه على الكديسة ، وبقولو ليك الزول دا عندو كديسة يعنى مكشكش شوية ..
كديستين فى مقتبل العمر إستباحتا سور منزلنا الخارجى ….تجدهما منبطحتان فى دعة وإستكانة وشعرة جلد مطلوقة …حلاتن يا ناسى …وكن مؤدبات لا تتعديا حدودهما ….تاكلا من قمامة الشارع ولا تجرؤان على الدخول ….ثم كان أن انجبتا عدد من القطط الصغيرة ،فأشفقنا عليهما أنا وإبنتى وبدأنا فى إطعامهما….نفسناهن رسمى …فجأة لاحظت نقصان شديد للبن البودرة ، وكما تعرفون فأن سعر كيس اللبن قارب سعر نصف جرام مختوم من الذهب عيار ٢٤ ،فعنفت إبنتى تعنيفا شديدا :-عليك الله إنتى ما هبلة …. عشان ما طالع من جيبك ….انتى زاتك عندك حساسية صدر … وبعد أجتماع مغلق وسري جدا مع أبو العيال ،قررنا أخذ الصغار بى سلامتن فى شوال والتخلص منهن ….وكعادة القطط فقد وجدناهن بعد اسبوع يتقافذن بفرح بالقرب من أمهاتهم …..جيدا جيتو….. ويبدو انهم قد إتخذوا موقف تجاهنا …تجاهل تام ونظرة بقعر العين ومافى سلام ولا كلام ….اصلا الحقارة كعبة ياخ …بعد فترة تفرق الأطفال ولم نجد لهم أثرا.. الامهات لازلن موجودات .
المشكلة الأن فى ان الامهات ومعهن ذكر ضخم الجثة ذو شعر كثيف بنى اللون وعينين حادتين وبشبه الاسد لحد كبير وما عارفة لقطوه من وين ، بدأوا جميعا فى إستباحة البيت، صاروا يتجولون براحة تامة فى الحوش …الراجل دا مأجر ليهن يا ربى وأنا ما عارفة ؟هههههه …ولما لم يجدوا منا مقاومة تذكر مجرد فس …..وبس متفرقات ….باتت واحدة منهم فى الداخل على حين غفلة ، ومع البرد يظهر أنها تغطت فى كومة ملابس فى سبت الغسيل وطبعا عينك ما تشوف الا النور..ماكلة شنو الخرابة!!! يعنى جابت ليها غسيل(مخرجات) كدايس؟!!!!
ومع القحط والمسغبة التى طالت كل شئ بدأن فى التسلل للمطبخ …..اها دى العوجة ….ولأن المطبخ خارجى فقد عشنا فى كابوس حقيقى ….أقفل معاك المطبخ ياخ….الكديسة جوة وماشايفها؟ يا امى الكديسة خطفت كيس اللحمة الخاتاه فى الطربيزة…..وانت داخل للمطبخ يسمعن حركة خطواتك فيكابسن للخروج بسرعة شديدة وممكن ينيشو فى طريقن اى عدة …حركات الكدايس الغير مسئولة العارفنها ديك ….وممكن فى طريقها تخربشك….كمان فيها حقن سعر ؟!وهى زاتا حتتلقى؟!
نحن الان فى مشكلة حقيقية …انتباه وحرص شديدين فى تغطية كل شى …ياخ ديل بلحقوا كيس العيش … قلب وتمزيق لسبت القمامة بالمطبخ ….بدات فى اطعامهن بقايا الجلافيط وجلد الفراخ اخير من كل مرة القى السبت مشنقل ، ووضعت طبق بالحوش لرمى بقايا الطعام …كان يشبعن ….ولدتكن ونسيتكن؟!
الذكر ذو الشكل المرعب بدا أيضا فى الدخول للمطبخ ….عليك الله ما تخجل وأمسك محل الرجال وللا على الاقل اكل حريمك ديل!!…..
كل القمامة بالشارع بقت مقحطة علب زبادى فارغة …بامبرز…..باقات زيت ….قوارير ببسى فارغة …والله يدى العافية.