عوض غفران
مليشيات ما بعد.الحرب هم السماسرة والمسوقين.
أوقعا ليكم زي ما وقعت لي بالتجرية والبحث؟ طيب، بس طول بالك معاي شوية!
صاحب ملك بيعرض ليك إيجار خرافي وبقولك الدكان خلو رجل، والرجل التي ستخلو غير موجودة اساسا يعني صاحب الدكان بشيل رجله من دكانه بس ويردم ليك في حق الايجار العايزه. شفت كيفن. الدكان اصلا خالي رجل فيه باقي عفش من ايام الحرب. المستاجر اتخارج براهو. البنعرفه خلو الرجل ده زول عنده محل مشهور زباينه واقفة مش القصة بيع هواء ولسة عقده فيه سنوات وبعملك اتفاق مع المالك. كيف مالك يخلي رجل😀
المهم، وبعداك بقولك.عايز 3 شهور مقدم لا واذا عايز تشوف الدكان عشان يمشي معاك تدفع قروش مرات بتصل عشرة والا خمستعاشر حق معاينة بس لانه حضرة سيادته ما بوديك دكانه تشوفه ويمكن ما تأجره فبياخد حق مشواره😂
غايته انا متاكد لو الدكان ده بير دهب بتبحت وتشيل انت بتخش نادي الخاسرين البمرقوا ضعاف وعرايا من ربع السنة الأولى.
اها نديك الثانية، الدكاز ايجاره الف وخمسمية دولار. اي دولار ركز كويس يا مولانا،،،، حمام مافيه، بابه عايز صيانه علي المستاجر. ولو الدكان ماعايز اي شغل السعر ده بزيد.
ياخوانا كدي قولوا لي الحاجة البتاجروا فيها في السودان بساتجروا ليها الدكان بالسعر ده شنو؟ انا عايز اتاجر في الحاجة دي بس. ان شاء الله تسويق قونات ولوايفة.
طبعا قمت ضربت القصة دي وانا بليد في الحساب،
يعني بتدفع حوالي 18 الف دولار( لو غلط.صححوني) وعشان الإيجار ده يكون منطقي، لازم هامش الربح الشهري يغطي 1500 دولار إيجار شهريا زيد.عليها كهرباء وعمالة وجبايات اخونا والي الخرطوم ابو يدا شافية، وما تنسى ضرايب اخونا في الله جبريل وبنات الزكاة الما بعرفن النصاب. بلطن لط، ده خليك من يكون عندك التزامات بنكية بتسدد بيها راس المال يعني لازم تحقق صافي ربح شهري لا يقل عن 4–5 آلاف دولار.
يا اخوانا الناس دي لو بتغسل كلمونا، بتبيع ذمم كلمونا. طبعا في ناس بتربح الرقم ده انا عارفهم والله بس ديل والله ما قاعدين يأجروا ديل ببنوا في اراضي الحكومة وبستخدموا مكاتبها ومبانيها، وطبعا ديل بتاجروا في مال الدولة أو بتاجروا في حقهم وبياكلوا مال الدولة من ضرايب وجمارك. وبياخدوا عطاءات بشيلوا قروشها وما بنفذوها.
المهم اديكم الزيت، بحسب جولة شخصية الاف العروض اللافة دي وهمية وشغل سماسرة اساسا مافي دكان، في ناس قاعدين يحرروا في السوق ومستهدفين مناطق الموية فيها لسة قاطعة وكهربتها في علم الغيب والاحياء الفيها نصها مقفلة وبرضه الناس بتعرض بنظام احجز مكانك من بدري، وانت تركب الظوط وهو مالو مالك قبض عمولته والسلام. يعني هو لو الدكان شغال ما بغطي لي ايجارك ده كيف ادفع بالميت تلاتة شهور ليك انت وانا ما بكسب منتظر الناس تجي ويمكن متاخرين شوية وشفعهم ما خلصوا مدرسة واكان جوا ذاته يكون دايرين ليهم تاني شهرين عشان يوفروا قروش بعد صرفوا العندهم في العودة والوراهم داير وقت.
طبعا مع وهمية العروض في نكتة، اختم ليكم بيها. لمان تلقى دكان حقيقي عشان تصل للعارض الحقيقي بتلقاه عارض بنصف القيمة وفي عشرة مسوقين كل زول خاتي طاقيته. وطبعا البتتواصل معاه من الأول لمان خلاص يتاكد انك جادي وممكن تصل للزول ده من غيره بييع لك المعلومة بعشرة الف والا عشرين وبقولك بوصلك الزول البعرف المالك وعادي البتصله تلقاهو ما المالك لكن الاقرب من المالك بثمانية اشخاص وتقعد تفرتق فيهم زي قشر البصل الفاوة.
ما تركب ماسورة، الايجار الغالي بيضرب الارباح، وما تخت املك انه الشغل بمشي وبغطي خت الخسارة قبل الربح. ثانيا ما لقيت مالك ما تأجر، لانه في مكاتب برضه قاعدة تأجر للناس بدون علم المالك، ومستفيدين من عقودات ايجار قديمة للمحلات دي ومن غير علم اصحابها، وخصوصا ناس خلو الرجل. ديل ناس الحرب دمرت محلاتهم المستاجرنها وفي الغالب عقده انتهي أو بعد الحرب يمكن صاحب المحل ما يواصل معاه، عشان كده جاء قبل يلافي المالك عايز يتخارج من الخردة وبأجرلك خلو رجل من الباطن عايز يمسك ليه مليارين تلاتة ويفكك لي شكلة طويلة عريضة مع صاحب الملك الما رجع من النزوح في مصر والا السعودية لسة. ابقى مفتح يا مالك يا مكتب معروف ويوريك تفويض المالك.
خليك واعي ما تشفشف بالكلام الحلو بعد اتشفشفت بالسلاح. واهدا اهدا وخت الكورة واطة. مرات سك الغنا فقر خاشي عليك بالساحق والماحق.
الله يستركم
