البرهان بالنسبة للاسلاميين كرت محروق لكنه أيضاً عندو القابلية انو يخضع للضغوط ويتخلص منهم وغير كدة عندو رغبة وشهوة للسلطة
كتب الأستاذ/ عمار خليفة :
في ما يختص بالفيديو المتدوال والمنتشر للكوز محمد يوسف كبر رئيس مجلس الشوري للمؤتمر الوطني حاتناول كلام محمد يوسف كبر من وجهة نظر مختلفة شوية … خلينا في الأول نشوف هو قال شنو وبعدين برجع للتعليق .
محمد يوسف كبر رئيس شوري المؤتمر الوطني المحلول والقيادي في الحركة الإسلامية الإرهابية :
البرهان ما كان عندو دور وما كان محسوب ظابط ذاتو . البرهان كان بقعدو زي الحرس بره . كلمنا البرهان قلنا ليهو جايبنك في المجلس العسكري لسحق المتظاهرين ويسلما للاسلاميين ، البرهان ما بيقدر يعمل لينا حاجه .
التعليق :
نحن صراعنا مع الكيزان والحركة الاسلامية صراع طويل الأمد ممتد لعشرات السنوات … الخبرة الطويلة دي خلتنا نعرف هم بيفكروا كيف وبيخططوا لشنو وأهدافهم شنو .
أول حاجة لازم تلاحظوها انو محمد يوسف كبر ده ما عضو عادي في التنظيم الكيزاني ده قيادي ورئيس مجلس شوري المؤتمر الوطني يعني ديل الناس البيفكروا ويصنعوا الخطط لمصلحة التنظيم . الحاجة التانية الدايركم تلاحظوها انو الفيديو تم تسجيلو في قعدة خاصة وغالباً المتواجدين معظمهم من المنتمين او الموالين للحركة الاسلامية . الحاجة التالتة محمد يوسف كبر كان ماسك ورقة وقلم وده معناها انو دي حاجة مرتبة وعندو نقاط معينة داير يتكلم فيها وما ينساها .
الفيديو ده مسرب وعن قصد ولاغراض معينة .
الاسلاميين من الفيديو ده دايرين يتغدوا بالبرهان قبل ما يتعشي بيهم … دايريين يقولوا للبرهان نحن كاسلاميين اذا ما متواجدين في اللعبة دي وما لاعبين انت ذاتك ما حتكون موجود وما حتلعب وما تعمل فيها شفت … دايرين يقولوا للشعب السوداني والمجتمع الدولي انو التصنيف بتاع الحركة الاسلامية كتنظيم ارهابي ما مفروض يكون لينا برانا ولازم يشمل البرهان وبقية قادة الجيش لانهم تبعنا في التنظيم ونحن الجبناهم عشان ينفذوا اوامرنا وبراكم شايفين نحن متحكمين فيهم كيف .
البرهان بالنسبة للاسلاميين كرت محروق لكنه أيضاً عندو القابلية انو يخضع للضغوط ويتخلص منهم وغير كدة عندو رغبة وشهوة للسلطة . وبالنسبة للاسلاميين ، ياسر العطا وكباشي وابراهيم جابر برضو كروت محروقة مكشوفة انتهت مدة صلاحيتها . الغرض الاساسي من محتوي هذا الفيديو ممارسة الضغوط لازاحة البرهان وكل قادة الجيش من المشهد بدون التخلي عن الجيش كوسيلة اساسية للعودة للسلطة لتكون الخطوة التالية تقديم مجموعة جديدة من الضباط المنتمين للحركة الاسلامية الغير معروفين كقادة جدد للقوات المسلحة وبذلك يضمنوا استمرار نفوذهم وتحكمهم في الجيش وشوية شوية يرجعوا للسلطة مرة اخري .
