هشام علي ود قلبا
المحاسبة ..
أنا لو ساذج بدرجة “عمبلوك” ، وما شكيت أبداً في إنه المستفيدين من خطاب الجهوية والعنصرية هم البخططوا وبنفذوا وبرعوا الخطاب القبيح ده ، وعاملين ليه غرف وأبواق بصرفوا عليها وبحموها .. ولو ساذج بدرجة “عمبلوك” لدرجة إني بصدق طق الحنك البقولوه في منابرهم إنهم ضد الجهوية والعنصرية ..
ما ممكن “عمبلكتي” دي تمنعني ما أسأل نفسي سؤال :
كبار أبواق وواجهات وغرف خطاب الجهوية والعنصرية كللللهم معروفين منو ، ووين ، ومحددة عناوينهم وبفطروا وين وبشتروا كسرتهم من منو ، وقهوتهم سادة ولا بي كم معلقة سكر .. ليييييه مافي زول بتخذ ضدهم إجراءات قانونية طالما ضد الخطاب ده ؟؟
ما بنفتر من التوعية ومحاربة خطاب الجهوية والعنصرية الكريه ، ما بنكل ولا بنمل .. لكن إنت يا “العمبلوك” المسيوق وراء الخطاب ده ، ما سألت نفسك السؤال الفوق ده ؟؟
إنت موش بتقول ضدهم وضد خطابهم ، ما بتحاسبهم ليه ؟؟
