في البلدان الفيها حكومات محترمة ووزراء محترمين .. لما يمشي وزير يشتري مسلتزماته الشخصية ، ما بستغل المشوار ويحوله لمنبر خطابي يطلع فيه أمراضه النفسية ..

#كتب #هشام_ود_قلبا
في البلدان الفيها حكومات محترمة ووزراء محترمين .. لما يمشي وزير يشتري مسلتزماته الشخصية ، ما بستغل المشوار ويحوله لمنبر خطابي يطلع فيه أمراضه النفسية ..
حتى لو كان التصوير عفوي بتلفون واحد من المواطنين ، بكون تركيز الوزير (المحترم) على مواضيع غير البشتن بيها الأعيسر روحه دي ، مواضيع زي :
– تهنئة المواطنين بيوم عرفة والعيد
– سماع همومهم ومشاكلهم والضيق العايشنه
– يتكلم عن كهرباء ، موية ، علاج ، مدرسة
– يتكلم عن اسعار الاضاحي المليارية
….. الخ
الأعيسر حول مشواره الشخصي لمنبر شتيمة وكوراك وجعجعة فاضية ما أستفاد منها الحضور حوله ولا مشاهدين الفيديو أي شيء.
لو فككنا الفيديو ما حنطلع منه بغير :
– الأم فريحانه المعتادة ..
أي جملة عاوز يقولها الأعيسر مستهلها بكون (أنا وزير) ، أم فريحانه ما فارقته سنة وشوية ، ولا حتفارقه حتى يلقى ربه .. والله يكون في عون الحيحضرو خرفو لأنه حيكون كله (يا ود أنا الوزير جيب لي موية) و (يا بت أنا الوزير سوي لي شاي) ، ولك أن تتخيل باقي الونسة حتكون كيف !!
– لعلعة وكورك في لا شيء ..
والغريب بكورك عن كوراك الناس في الانترنت ويجعجع ويتحداهم يجو يشتروا خرفان من أمدرمان ..
البكوركوا في الانترنت من برة السودان خليهم .. في ملايين على بعد أمتار منك ، ما قدروا يجو يشتروا خروف زيك بمليارات ، وما بقدروا يكوركوا زينا من برة البلد ، والا حيجوهم كلاب لهب سيدك ويلقوا نفسهم في مواجهة حبل المشنقة ده لو محظوظين ، لأنه في العادة بتكون المحاكمة ميادنية بتنتهي برصاصتين وخلاص ..
– جعجعة وتحدي مريض ..
لو جية سوق الخرفان في امدرمان بطولة ، تبقى الخرفان الوراك دي هي البتستحق لقب البطولة ما إنت ، لأنها موجودة وقاعدة هناك قبل ما إنت تجي ببرشوت البرهان وتنزل بجوازك البريطاني في بورتسودان متنعم في فندق خمسة نجوم ، وبدفعوا تمن الموية البتقضي بيها حاجتك الغبش الحارسين خرفانهم دي ما فارقوها .. تجي إنت الليلة تعمل فيها “رامبو” !!
– تهديد الخصوم ..
إنت يا الإعيسر (قرعة بتتعاير بشعر بت خالتها) .. بتخوف وبتهدد في خصومك بتسلط وسلاح وطغيان سيدك البرهان ، وإنت ما بتملك في المعادلة دي غير حلقوم يجعجع وضنب تهزو ..
تهديدك وتخويفك ده سببه غرورك ما جهل منك ، لإنك عارف قصص هتلر وتشاوسيسكو والقذافي والأسد ومبارك والمخلوع ، لكن غرورك منعك تاخد العبرة منها ، ومنعك تفهم أنه التخويف والأرهاب والبطش بالخصوم عمرهم ما ببقوا أساس لنظام وحكم ثابت يستمر ، انهياره حتمي .. فمهما تطاول تسلط سيدك البتخوفنا بيه ده ومهما تطاول زمن إستوزارك مصيركم الاتنين الى زوال بعد ما إتكتبت أساميكم في اوسخ صفحة في كتاب التاريخ.
يا الاعيسر ..
نحن بتاعين الانترنت معركتنا معاك في الإعلام ، سلاحنا فيها كلمة حق رصينة ، وسلاحك التدليس والكوراك والبشتنة البتسوي فيها دي ، فطبيعي إنك تخسر 90/ صفر .. تقوم لما تخسر في ميدان الإعلام تقول “كان بتقدروا تعالوا لي في ميدان الخرفان” ؟!!
ياخ إختشي.
الكلام الكتير الفوق ده إنت يا الأعيسر ما بتستحق وقتي الكتبته فيه ، فما تفرح نرجيستك وتظن إني كاتبه ليك .. أنا كاتبه ليوم ينادوا التاريخ شاهد ، وكاتبه لأجيال جايه يشوفوا في عهدكم وصلتوا البلد لياتو درك من الإنحطاط والسفه
#الثورة_مستمرة