تطبيق «بنكك» التابع لـ بنك الخرطوم بقى بصورة متكررة واقف، والكاش ما متوفر، والتحويلات متعطلة… والمواطن هو البيدفع التمن!

معتز عادل
إلى بنك الخرطوم… البنك المركزي… والمسؤولين في الدولة
يا جماعة الخير، المواطن السوداني حَتّى متين حيفضل يعاني؟!
تطبيق «بنكك» التابع لـ بنك الخرطوم بقى بصورة متكررة واقف، والكاش ما متوفر، والتحويلات متعطلة… والمواطن هو البيدفع التمن!
الموضوع ما بقى مجرد تطبيق واقع أو خدمة متأخرة…
الموضوع بقى متعلق بحياة ناس!
في مريض محتاج يدفع قيمة علاجه،
وفي زول داخل عملية مستعجلة،
وفي مريض في المستشفى ما بطلعوه إلا بعد دفع الفاتورة،
وفي أب أو أم كبار في السن محتاجين حق الأكل والدواء،
وفي أطفال منتظرين مصاريف علاجهم وأكلهم وشربهم.
الناس ما عندها رفاهية تقول: “ننتظر لحدي التطبيق يشتغل”.
لما الخدمة المصرفية تتوقف بالساعات، المواطن ما بعرف يعمل شنو…
لا كاش متوفر، ولا تحويل شغال، ولا بديل مضمون.
يا بنك الخرطوم، ويا البنك المركزي، ويا المسؤولين في الدولة:
أين الحل؟!
إلى متى يظل المواطن رهينة لتعطل الأنظمة ونقص السيولة؟
هل معقول زول يكون عنده قروش في حسابه، لكن ما قادر يستخدمها وقت حاجته؟!
نحن ما بنطلب المستحيل…
بنطلب خدمة مستقرة، ونظام مصرفي يحترم ظروف المواطن وحياته.
والله في ناس ظروفها ما بتسمح بالانتظار…
ناس بتتوجع، وناس بتتعالج، وناس بتكافح عشان تعيش.
📢 الموضوع محتاج تدخل عاجل وحقيقي، مش مجرد اعتذار ورسالة “حاول مرة أخرى”.
يا عالم… الناس تعبت!
يا مسؤولين… المواطن محتاج حقه في الوقت البحتاجو فيه، مش بعد فوات الأوان.
✍️ معتز عادل
#بنكك
#بنك_الخرطوم
#البنك_المركزي
#حق_المواطن
#السودان