منال محمد الحسن
عضو ةمجهوله الهوية(طبعا دي انا ما تعاينو لبروفايلي اعملوا نفسكم ما بتعرفوني )
يا اخواتي جيتكم موجوعة اسمعوا قصتي دي
انا اصلا رغم فصاحتي صدقوا بخاف من الفار وبكرهه عديل كدا وعندي فوبيا الفيران(كان فار انسان ولا حيوان)
وكمان المشكلة لو جقر (والجقر دا فار قدر الأسد )
المهم.انا بكتب ليكم وبرجف ومستعجلة شديد وبلخبط واكتب غلط
بيتنا فيه شباك مع المنور دخل كم.جقر وجبنا لاصق ما نفع سم ما نفع في الاخر فكرناو
جبنا شرك. وعملنا طماطم قام الجقر دخل جوة. الشرك واتقبض 🐁
واسه انا وبت اختي برانا وماعارفين نعمل شنو نتصل علي الدفاع المدني؟
دولا نتصل علي زول من معارفنا يجي يشيله؟
ولا نشوف لينا مسدس نقتله ؟
ولا احسن نسخن موية نرميه بالمرة يتسلق ونعملو شوربة
مع العلم عندي حبة.رز ممكن افلفله وفي سلطة ولا الرأي شنو ؟
تاني بقول ليكم ما تردموني وقدموا لي الشوري اسه انا بتكلم معاكم والعرق يصبصب مني رغم انو المكيف فاتح وبت اختي جاتها رجفة وبقت تتكلم بره.من رأسها
اختكم الموجوعة
استشارات تفقع المرارت زي دي
كثرت في الاونة الأخيرة.بقروبات
الاستشارات في وسائل التواصل الاجتماعي بصورةتدعو للعجب
والاعجب هو نوعية.الاستشارة وموضوعها .والصيغ والالفاظ واعجب العجب الردود والتعليقات علي المنشورات والبوستات
قروبات تخص النساء حسب قولهن ولكن داخل القروب ألفاظ وأسلوب واضح وظاهر انه يوجد كذلك رجال بأسماء مستعارة وهذا موضوع اخر
مثلا تلقي واحدة.كاتبة
يا اخواتي انا جيتكم الحقوني واعذروني بكتب سريع ومستعجلة عشان كدا بلخبط(طبعا دي عبارة.ثابته لمعظم طالبات الاستشارات )
وتواصل لقيت زوجي بتكلم مع واحدة بالتلفون وبعد فات شلت التلفون واتصلت نبذتها وقامت كلمتو وطلقني طوالي
واسه انا في الشارع رمي لي ملابسي وماعارفه امشي وين لانو ماعندي زول غير خالتي وهي زوله صعبه في المعاملة وقلت ارجع اقول ليه معليش عشان ادخل لكن تاني قلت دي عدم كرامة ويلا سريع وروني اعمل شنو عليكم الله من غير ردم (انتهت)
وطبعا بمجرد طلب كلمة.عدم الردم دي بجيها الردم الصاح
زي نوع الردود دي:
انتي ماعندك.كرامة كيف تفكري ترجعي لزول طردك تستاهلي
مادام ماعندك مكان. تطيري ليه الشلاقة ليك شنو؟ كان تسكتي وتعملي نفسك ماشفتي ولا سمعتي
وتجي واحدة.تاني تقول ليها يازوله.ارجعي ليه واطلبي السماح اخير من خالتك الصعبة
وتجي تالثة ترد:
وانتي مالك بتتجسسي علي تلفونه؟
اما الرابعة تقول ليها اخير تمشي لخالتك وتصبري
طبعا الباقيات ردودهم تستاهلي وغبيه وشليقة وووو
وبعد يومين تعمل للمنشور تعديل
الشاكية وتقول؛
شكرا ليكم وبقول للناس الردمتني الله موجود
بس ابشركم رجعت لزوجي وطلع بتكلم مع زميلتة في الشغل وكلفها بعمل وطلع ما عندو معاها علاقة
وأما نوع استشارة البنات .عجيبه:
أتقدم لي واحد والزواج قرب وجهزنا كل شيء لكن جاء خطيبي الأول دااااك وقال الزواج لو تم بقتل خطيبي التاني دا وووو
طبعا دي أغلب الردود بتكون أريتو يقتلو ويقتلك معاه
ولا كمان تلقي واحدة.تقول ليك عندي مناسبة وعندي ثوب لونه مسطردة بالكوبي كدا ما عارفة اشتري كارينا لون شنو؟
والمناسب شنو وتلحقها لي بكلمة.سريييييع يابنات الفرح الماشة ليهو دا بكرة
اما استشارات النسيبة والحموات حدث ولا حرج تجي الواحدة.تقول ليك:
نسيبتي بتقول للناس انا عايزة.اعرس لولدي زوجة تاني عشان كدا وكدا اعمل فيها شنو ؟
طبعا ردود فظيعة ما بتتقال لكن اخطرها اعملي ليها سم.في عصير
ولا كمان تجي النسيبة تقول ؛ زوجه ولدي جنها نوم عايزاها تبطل النوم.الكتير اعمل شنو؟
غايتو
دي اول ردم دعوة بقولوا ليها تنومي في احمد شرفي (طبعا دي مقابر مشهورة) في .امدر
يامرة مالك ومالها وانت مالك.مراقبها ؟وولدك شكي ولا بكي ليك؟
ولا كمان يقولوا ليها ماتمشي تنومي انت ذاتك وريحينا
المهم باختصار في المشاكل الحقيقية والواقعية
لكن الغالب تأليف وسواقة بالخلاء تكون صاحبةالاستشارة نائمة في بيتها تصحو تكتب لينا استشارة انو زوجها قال ليها الا تجيه في لندن وأصر شديد وتقول لينا انا ما بقدر اخلي امي براها والمشكلة أولادي عايزين السفر وماعارفة اسافر واخلي امي براها ما معاها زول
ولا أرفض السفر واخلي زوجي براه يتبهدل في لندن(وهي لا اتزوجت ولا ولدت ولا شافت ليها طيارة.حتي)
وموخرأ ظهرت استشارات تخالف الآداب والحياء ودون خجل بصورة.تدعو للغثيان
كمان.للاسف ايضا نقول و
الحق يقال في كميةتنمر احيانا شديدة لصاحبات استشارات يغلب علي مشاكلهن الصدق
ولكن أغلب الردود تهكم واستهتار وشتيمة
وهناك من تستاهل او (يستاهل) الردم
عن نفسي دوما بتابع التعليقات أكثر مما اعلق 👀
صراحة.ظاهرة تحتاج باحث او باحثة سريع ومذيد من النقاش
كسرة:ما تركزو ا مع فاري بالله
الفار فاري براي ومنو البقبضو معاي؟؟
