س: متين تأسست مليشيا الدعم السريع؟! ج: في سنة 2013. س: أسسها منو ؟ ج: الكيزان. س: شرعن وضعها منو ؟ ج: برلمان الكيزان.

كتب: د. مهند رحمة.
س: متين تأسست مليشيا الدعم السريع؟!
ج: في سنة 2013.
س: أسسها منو ؟
ج: الكيزان.
س: شرعن وضعها منو ؟
ج: برلمان الكيزان.
س: المنحها موارد مالية مستقلة زي جبال الذهب، وفتح ليها قنوات تعامل سياسي خارجي، عشان تقوي نفسها، وتتسلح، منو ؟
ج: الكيزان.
س: أسسوها الكيزان ليه؟
ج: عشان تحارب بالإنابة عنهم الحركات المتمردة.
س: الحركات المتمردة دي ياها مشتركة فوق ؟
ج: ياها ذاتا.
س: يعني المتمردين الكنا بنشتمهم ونتهمهم بالعمالة والإرتزاق.. هم نفس الناس البنغني ليهم هسه.. ؟!
ج: أيوه ياهم.
س: يعني مليشيا أسسوها الكيزان.. ودعموها الكيزان.. وقننوها الكيزان.. عشان تحارب بالإنابة عنهم سودانيين تانيين..؟
ج: أيوه.
س: مليشبَيا الدعم السريع كانت مليشيا كويسة واخلاقية في حروبها؟
ج: لا.. أفراد مليشيا الدعم السريع كانوا بحرقوا القرى، وبحتلوا البيوت، وبغتصبوا النساء، وبنهبوا الأسواق.. بتقارير منظمات حقوقية كتيرة.
س: هل حاول الغرب الكافر العميل إدانتهم.. ؟!
ج: نعم.. مجلس الأمن قام بعقد جلسة لتجريم المليشيا دي في قاعاته..
س: هل القحاتة العملاء دافعوا عنهم ورفضوا تجريمهم.. ؟!
ج: لا.. دافع عنهم الكيزان.. أرسلوا مندوبهم، دفع الله الحاج، لمعارضة القرار وقال ان الدعم السريع يتبع للجيش السوداني.. وانهم ضد تجريمهم.
س: ياهو نفسو دفع الله الحاج الرسلوه حالياً للأمم المتحدة عشان يطلب من ذات الأمم المتحدة تجريم الدعم السريع.. ؟!
ج: ياهو ذاتو.
س: عندو زهايمر.. ؟!
ج: نصييح.
س: يعني من تاريخ إنشاء الدعم السريع، المليشيا دي كانت بتعمل في دارفور، نفس العملوه في الخرطوم ؟
ج: أيوه.
س: هل كان في دعوات لتخوينهم وقتها..؟!.. وعبارات زي: كيف نتصالح مع الناس القتلونا وسرقوا بيوتنا وانتهكوا أعراضنا.. ؟!
ج: لا.
س: ليه لا..؟!
ج: لأنهم في طوع الكيزان وقتها..
الدعم السريع كان بقتل ويسرق ويغتصب.. والبشير برقص في الساحة الخضراء وبدلع حميدتي بحمايتي..
الدعم السريع كان بقتل ويسرق ويغتصب.. والكيزان كانوا بتغزلوا في الصحافة في حميدتي لمشاركته في فض الاعتصام ويقولوا ليهو أحسنت ايها القائد حميدتي ونطمع في المزيد..
الدعم السريع كان بقتل ويسرق ويغتصب.. والبرهان بطلع في الشاشات يقول لينا الدعم السريع من رحمنا نحن ديل.
س: يعني الدعم السريع من سنة 2013 كان بقتل ويسرق ويغتصب.. تحت علم وسمع وبصر الكيزان والجيش والعالم..
ج: نعم.
س: يعني اكتر من 10 سنوات الدعم السريع كان بقتل ويسرق ويغتصب.. ؟!
ج: نعم.
س: ليه فجأة في 2023 اكتشف الكيزان انو الدعم السريع مليشيا بتقتل وتسرق وتغتصب.. ؟!.. وما ينفع نتصالح مع الناس البيقتلوا ويسرقوا ويغتصبوا.. ؟!
ج: قحاطي عميل.. أربط كدمولك.. بل بس..
#تجرأ_لتعرف