عوض ابوشعرة
شوفوا علي كرتي كاتب شنو ،، هههههههههه
بعدما دمروا السودان ،، سيادتو بيوعدنا بأنقاذه ،،
وقال ملتزم بعدم العودة للماضي ،، مع انو مافي ماضي ،، لسه نحنا نرزح تحت قبضتكم العضودة بعد ان وصلتم لقناعة انكم تكتلوا الشعب كلو ،، ومال الكيماوي ده بقتل القحاته براهم ،، ؟
وقال ايه ،، قال بيوعدنا بعدم القفز في المجهول ونحنا اصلا بسببكم قفزنا زمااان يا عمك ،،
وتاني قال حيعودوا عودة واعية ،، وبي شنو ،، ؟ بي منهج اسلامي ،، مع اننا لينا ٣٥ سنه بنحاول نعرف المنهج الاسلامي ( السياسي ) ده شنو ما عرفنا ،،
ولا عرفنا نشرح عبارة توجه حضاري ولا هم شرحوها ،، مع انو الحصل كان ضد الحضارة والانسانية والعدل ،، !
وكلمة توجه حضاري دي بتذكرني التوالي السياسي بتاع الثعلب حسن الترابي الذي بشر به الناس ،، رغم ان الاحزاب كانت محظورة من ممارسة النشاط ،، وحتي الان لا يعرف احد ماذا كان يعني بعبارة التوالي السياسي ،،
وقال هذا الهولاكو المعاصر انهم حيبنوا الدولة بي المؤسسات والخبرة ،، مع انو المؤسسات اللقوها قاعدة باعوها ،، او شلعوها ،، !
شلعوا مشروع الجزيرة ،،
وشلعوا السكة حديد ،،
وباعوا بواخر سودان لاين خردة ،،
وباعوا دار الهاتف ،،
وباعوا بواخر النقل النهري وفرتكوا المؤسسة ،،
وباعوا بيوت السودان بالخارج ،،
واشعلوا الحروب العنصرية ،،
وصادروا الهيئات العدلية لمصلحة تغطية فسادهم واجرامهم ،، وجاي يتكلم عن تحقيق العدل ،،
صدروا اناث الابل ،،
وتقاوي المحاصيل ،،
وشلعوا الخدمة المدنية ،، ورغم كده بتكلم عن الخبرة ، مع انوخبرات بني كوز بعد سرقتهم للخدمة المدنية كانت مصدر للاستغراب والسخرية ،، فقد شهدنا كيف يتم تعيين كوز خريج لغة عربية او تربية اسلامية مثلا ،، مديرا لمؤسسة فنية تتطلب كوادر متخصصة ،، وقس علي ذلك ،،
ثم الحرب التي اشعلها هذا الكرتي ،، وجاي الان بعدما شعر بالخطر عايز يخدع الناس مرة اخري وكأن الناس بلا ذواكر ،، او كأن ما فعلوه مضت عليه قرون ،، !
وقف الحرب يا علي كرتي وقدم نفسك للعدالة يمكن تطهرك من رجس جرائمك التي لا تحصي ولا تعد ،،
#ولازم_تقيف
