الحاضر يكلم الغائب العيد ده الخروف ح يضبح المواطن وما في مخلوق أهم من مخلوق .. وكلنا اصبحنا ضحايا وأجرنا على الله .
أي موظف يشتري خروف وليهو أربعة شهور ما صرف .. لازم نشوف علاقته بالدعم السريع شنو !!
اي زول شغال رزق اليوم باليوم يشتري خروف يورينا علاقته بي تسعة طويلة شنو !!
طبعا توب عيد .. وحنة عيد وفقع عيد .. ح يجيب جغم للستات وخلونا في المعارك الدايرة بين الجيش والدعم السريع دؤ .. وما دايرين كوماجات في البيت …
ما محتاجين مرارة وشطة السنة دي .. لأن حكماء السودان شبعونا مرارات وقلبوا حياتنا أحر من الشطة نفسها .. الله يهدينا ويهديهم .
صور الضحايا المشويييين من المواطنين والدعم السريع والجيش .. ما خلت لينا نفس لي شية عشان نأكلها وإلا حتى نشمها أو حتي نشتهيها .
ده غير مات و لجأ ونزح واغتصبوا بناته وجغموا عربيته .
لغتنا ذاتها بقت مهددة بعدما اقتحمتها كلمات زي (انبشقت .. وانجغم واتبل .. وإنداس) .
غايتو الناس العندها أولاد في الدعم السريع .. بنقول ليهم عيد سعيد ومبروك عليكم العيد … والعيد عيدكم . ومبروك عليكم أموال الشعب السوداني ويا رب محل ما يسري يهري …
مبروك عليكم الأموال الملطخة بالدماء وأرواح الضحايا .. ومبروك عليكم سياراتنا وأثاثاتنا وشاشاتنا وقريشاتنا .. والحلال بيـّن والحرام بيّن وبصراحة موضوع النهب ده ما فيهو شبهات عشان تتقوها .
أخوانا اللاجئين في كل الدول العالم :
ما تهتموا للأيام
ظروف بتعدي
طبيعة الدنيا زي الموج
تشيل وتودي ..
وكونوا بخير فما انتم سواء لاجئين سودانين لاغير :
وهل يوما ذقت الجوع مع الغربة
والنوم علي الارض الصلبة
الارض العارية الرطبة
وأطفال تهتف حولك بالزفة : (عبد أسود .. عبد أسود) !!!
واها قبل ما أودعكم عندي تهاني خاصة لي ناس خاصين جدا :
أولا :
أخونا ديجانغو اركو مناوي مبروك عليك العيد وأنت مقيم في السماء ذات البروج وأنت بندافع عن أهلك في دار فور بالشهب والنيازك والمراكب الفضائية …
حبيبنا مناوي الحرب بدأت في الخرطوم واتفاق جوبا انضبح مع والي غرب دارفور وأخوك فكي جبرين لسه ماسك الشطر ولسه برضع وحالف ما يمسك القرون تاني حتى لو جوبا ذاتها ماتت .
تهنئة خاصة للسيد محمد حمدان دقلو ..
الضيع جميع أهلو
وجاب البلاء وزقلو
والحمد لله اننا عشنا و شفنا الطرف التالت البنهب والبقتل و البغتصب والبسوق المنهوبات من هنا لي ام دافوق … ولن تجد بعد الآن من يرفع رأسه ليقول أنني اؤيد الدعم السريع أو انتمي إليه من غير أسرتك المقربين الذين أخذتهم الحمية القبلية وليس القضية الوطنية .
*وكل عام والشعب السوداني بخير.*????????
ولا والف لا للحرب .
لا للبل .
نعم للسلام .
نعم المدنية .
ودمتم ساااااالمين
