صديقي الشاعر الرقيق الفنان حسن السر ..
العلم والذوق والشفافيه تمشي
حافية علي قدمين .. انجبه حي المورده الامدرماني .. والمورده
مش بتلعب وبس .. المورده بتكتب وتفكر وتغني .. وقد تزينت من صنيعها سماء الوطن بنجوم بمختلف الاحجام والألوان ..
وحسن السر من مواليد جامعة الخرطوم وما ادراك ماجامعة
الخرطوم في كل الازمنه .. علم
وإدب وثقافه ..
حسن السر.. سر يسير بين الناس في طهر شمعه .. في طلته بهاء .. وفي حديثه حياء
.. وفي شعره كل ملامح
القادم فكرة وتعبيرا ومعني ..
حين كتب يوما للصديق العظيم
ابو عركي البخيت بخاف اسأل عليك الناس ..
وسر الريده بينا يذيع .. خاف المغنون .. خاف قدامي الشعراء .. والليافع حسن يهز عرش مملكتهم بغناء لا عهد لهم
به ولا سلطان ..
خبأت فتيات الحي قارورات عطرها .. وللعطر كما يقولون افتضاح .. خاف العشاق على عشقهم والرقيق حسن نفسه قد خاف واكتفي بالوله والأمنيات..
واريت تعرف .. حنيني اليكا ..
يا ريتك ..
وأريت تعرف لحدة وين بحبك
.. وفي أعماقي حسيتك ..
بس أنا خايف .. إذا جيتك .. حكاية الريده تمشي تذيع
ومن ايديا انت تضيع
واعيش بعدك .. حياتي جفاف
.. مواسم بينا مافي ربيع ..
وليتك يا حسن لم تخف .. ليتك زرتا بيتو ..
واليحصل يحصل .. سجن
سجن .. غرامه غرامه ..
حسن السر اغانيات متفرقات.. بعضها ذهب لذات العركي الما
بغني كلام ساي ..
حسن السر وجه لا يسعى للضوء
.. والضوء في بلادنا أعمى ..
كل قصائد حسن حسنه .. قادمه من الاتجاه المعاكس ومدخرة للمستقبل .. هو مثله مثل صديقنا الراحل سعد الدين
ابراهيم حين يغني لمحبوبته ..
كان نبقى في المستقبل ..
بس نحن ما اتمهلنا ..
سبقنا عصرنا جينا .. لي عصر ما بحملنا ..
وبخاف يا انت لو جيتك ..
الملم في خطاوي الشوق
وازور بيتك ..
يقولو على حبيتك ..
واخاف لو برضى غبتا عليك
تقول جافيك .. وانا نسيتك
بهم لو صدفه لاقيتك.. درب حلتنا جابك يوم .. تشيل يا روحي ترمي اللوم على .. وتزيد همومي هموم ..
حسن السر .. حين تكون الكتابه
على خطى القادم .. على دروب
الحياة المتعبه ..
