اشرف مصطفي الهندي
أشياء كتيرة قد تكون بسيطة عندك لكن كبيرة عند صاحبها وعند الله عز وجل، زي انك تشتري من حد بسيط!
🙏أنا بشتري أي حاجة من البقالات الصغيرة والأكشاك
حتى الخضار، ولا أذهب إلى المحلات الكبيرة والسلاسل إلا لضرورة
ياريت نذكر بعض بأن دا كمان #خير وباب رزق لك ولغيرك!
وكمان أرجوكم بلاش نتفلسف على الغلابة ونطلع المارد اللي جوانا ونقعد نفاصل مع الست اللي حاطة كم حزمة خضار أو الرجل اللي بيبع شوية ليمون ونعناع!
أو اللي الغلبانة اللي واقفة في عز الحر أو البرد وقدامها كم كيس خبز علشان بتساعد أهلها أو بتصرف عليهم، وتقعد تقارن هي جيباه بكم من الفرن وهتكسب كم..ما هي لازم تكسب!
. 🙏عايز تشتري منها وتجبر خاطرها بتمنه او بزيادة كتر ألف خيرك ..
✋مش عايز يبقى نروح الفرن ونكتم نظريات الاقتصاد وجشع التجار والتخضم جوانا!
مش هنسيب البلاوي اللي حوالينا والفساد ونتشطر على الغلبان!
#أبواب_الخير مش بس صدقات وتبرعات وصلاة وصيام
لكن #جبر_الخواطر وتفقد الضعفاء والإحساس بالناس البسيطة كمان خير لك قبل ما يكون له🙏
الله يرحمك يا بابا كان بيوصيني في كل مشوار اني اشتري اي حاجة من الناس الغلابة حتى لو مش محتاجة لها، لأنه كان بيعمل كدا ويدخل بكيس فيه نعناع وكبريت وامشاط وليمون ونبق الخ
ودايما والله يذكرنا بالآية الكريمة( .. وَمَا أَنفَقْتُم مِّن شَيْءٍ فَهُوَ يُخْلِفُهُ ۖ وَهُوَ خَيْرُ الرَّازِقِينَ)
سلاما إليك يا #أبي
سلاما إلى الطيبين والنبلاء في الأرض
#أبواب_الخير
#جبرالخواطر
