لا تتصورو الالم الحسيتو جووه
قلبي .. وانا بسمع بي رحيل صديقي الفنان الجميل جدا عبدالواحد عبدالله .. اتصلت
بي صديقي طارق البحر وأكد لي الخبر .. الله الله الله ..
وبعدين معاك يا الحرب ..
بيني وعبدالواحد محبه لا يعلم
سرها الا الله .. حين كنت اسكن
بحري حي الدناقله كان هو بسكن الوابورات .. وما اتلاقينا
الا وكانت الابتسامه والضحكه حاضره بيننا رغم أنف الزهج ..
اتلاقينا مره صدفه نهار جمعه
من الجمع في دلالة الطريفي للعربات ودي كانت في قلب الخرطوم .. كنت انا بفتش لي عن هكره اشتريها .. اصلي كنت مجنون هكر .. وكان هو ساكي يتخلص من هكرتو الفلوكسجن
بعد كرهتو عيشتو .. هو ذاتو ما كان عارف الهكره دي قدرت تصل الدلاله كيف ََ..
اظنها ذاتا تكون زهجت منو .. المهم بعد صبر شديد في الدلاله قدر عبدالواحد يلقى لي مشتري دايش .. وطبعا ما صدق .. وشهدت انا على البيعه .. وبعد قبض عبد الوحد قروشو .. وقال لي بعد كده يا اخوي نتخارج من هنا .. وفعلا ركبنا طرحه واتوكلنا على امدرمان .. انا وهو راكبين ورا .. وصدق مما عاوز
التكسي يدخل الكبري .. عينا للفلوكسجن الما تغبانا واقفه في مدخل الكبري
وزولنا الاشتراها عرقان وفاتح الكبوت الورا ولسان حاولو بقول دي وقعة شنو دي .. عبدالواحد همس لي .. هلاوي اخد ساتر ..
وفعلا اخدنا سوا ساتر لما اظن
وصلنا شارع المورده .. وصدقو
من يوما .. انا شخصيا كل ما اشوف فلوكسجن اتذكر صاحبي. عبدالواحد .. وتلقاني
ماخد ساتره .. مع انو الفولكس
ده من اجود العربات .. بس هكر لا ..
الله يرحمك ويديك الجنه يا اخوي يا عبدالواحد .. كنت جميلا طيبا متسامحا مع كل
خلق الله ….
