طبع الغزال ..

ياربي ما هذا الدلال..
ياربي ما هذا الدلال .
وقفت بعيد..خلف الظلال..
لا اتقدمت..لا اتكلمت..
بالكاد تكون اتبسمت..
وبالإيد اشارت..و سلمت ..
وانا بالخطى الإتعسمت..
بين الظنون المحبطة..
وفي حيرة كانت مفرطة..
مشيت …عشان بس .اسالها .
خجلانة ..ام ..مستعجلة..
صمت الشفاه.. فهم السؤال..
لكنه ما جاد بالمقال..
حور العيون بالفتنة جال..
زي الشراع في الإرتحال..
همس الرموش فاض بالجمال..
ياربي ما هذا الدلال..
ياربي ما هذا الدلال..
وانا تاني جددت السؤال…
مكسوفة .. يا متألقة ..
وله الحكاية مبالغة ..
ودا ذاتو ما محسوب لقاء..
.ولأني فيك زايد ثقة..
اللحظة… قلت أوثقها..
رغم الظروف المرهقة..
وعارفك حريصة ومتشوقة..
وملامح الريدة فيك متدفقة..
ولو خايفة من القيل وقال..
في زحمة ضاق بيها المجال..
معذورة يا حلم الخيال..
الحق معاك على كل حال..
اصلو الحذر ..طبع الغزال..
يا ربي ما هذا الدلال ..
ياربي ما هذا الدلال..
مناقزا الحلاوين
جزيرة السودان