بعد غياب سنوات طويلة في الإمارات، رجعت السودان التقيت بواحد من الأصدقاء، وبقينا نتونس ونحكي، اتفاجأت انو لسه ما اتزوج وعمره تقريباً ٦٠ سنة، قلت ليهو ياخ ما معقول الحاصل شنو..
قال لي: عندي صديق عزيز علي عندو معرفة بأهل الإنسانة الأنا كنت بحبها، فـ كلمتو إنو يتوسط بحسب الصلة بينو وبين أخوها وكدا انو أنا راغب أتزوج فلانة دي، فـ لمن مشى ليهم وشافها عجبتو واتزوجها هو وخلاني أنا تايه💔
بعد الموقف دا عشت فترة طويلة في صدمة والجرح لم يتداوى..
بعد مرور تلاتة سنوات من زواجها التقينا في مناسبة جات عشان تسلِّم علي، قالت لي: إنت ما عرفتني؟ قلت ليها: ما عرفتك
ياخ أنا فلانة
قلت ليها: معليش لو ما عرفتك “أعذريني”
أنا التقطت هذه الكلمة من نيران صديقي وحزنه وكتبت أعذريني..
الأغنية لحنها صلاح إدريس واتفق مع سيف الجامعة إنو يغني الأغنية، في البروفة التانية سيف الجامعة اعتذر عن الحضور وصدفة كان موجود جمال فرفور فطلبنا منو يسجلها عشان سيف يعرف اللحن ويتحفظ للأوركسترا، كانت بروفة جميلة وأداء رائع من فرفور وبعدها قال الأغنية دي أنا ما حأخليها، قلنا ليهو إنت بس ثبتها لي سيف، قال برضو بغنيها حبيتها شديد،
رجعنا لي سيف الجامعة قال مافي أي مشكلة يغنيها جمال وأغنيها أنا..
كلمات الأغنية:
أعذريني الدمعة ديّا
حتبقى آخر دمعة ليّا..
تاني لو قرَّبت منك
يبقى ليكِ الحق عليّا..
أعذريني محال أعاود
تاني ريدتك وأمشي ليها..
ولا أرحل في عيونك
والطفولة الضاجة فيها..
كيف أريدك وإنتِ أصلك
ريدتي ما حسيتي بيها..
بالبعاد ما تعذبيني
أعذريني وأعذريني..
ما قدرت مرة واحدة
بالغلط أغلط عليكِ..
وإنتِ عمرك كلو ظالمة
والدليل غفراني ليكِ..
عارفو قلبك ما معايا
برضي تاعب روحي بيكِ..
بالحنان ما تعشميني
أعذريني وأعذريني..
من زمان وأنا راجي منك
كلمة بيها تفرحيني..
وإنتِ ما فرَّحتي قلبي
كنتِ ديمة بتجرحيني..
قسمة الزول ما بتفوتو
والـ بجيني معاك يجيني
لو بَكَن منك عيوني
سامحيها وأعذريني
#Tasneem
