الحرب دي اظهرت اسوأ ما فينا نحن شعب نعيش بالشعارات والاكاذيب
ظهرنا ونحن بنستغل بعض فى أوقات
الشدة ، الحوجة والظروف الصعبة والمشكلة انو بنتظاهر انو نحنا شعب كريم وشعب فاضل وعظيم وعندنا اخلاق وقيم.
بس الحقيقه انو نحنا وصلنا أدنى درجات الاستغلال والانانية والجشع والان اصبح السودان كله تجار ازمات والناس عانت معاناة شديدة بسبب الاستغلال , والكلام دا مامن جنس معين او منطقة معينة عشان مافي زول يبرر ويقول نحنا ما كدا. .. استغلال الظروف الحاصلة ببلدنا دي ظهر في كل مكان وبصورة وقحة جدااا اي زول بشوف مصلحته وكيف يتكسب من الوضع دا ….
في ناس بنت مستقبل واسست لاسرها من الحرب دي علي حساب ناس اتشردت وفقدت كل شئ
وعشان ما ادخل في الاستغلال الصاحب الحرب من الطلقة الاولى في الايجارات واستعباد الوافدين واستنزافهم بكل وقاحة وبعض من ” قلت الادب ” من الملاك . حاادخل في الاستغلال الجديدة للازمة الحالية ودي في المناطق الآذت الوافدين واستنزفتهم اليوم بيستغلوا بعضهم.
الازمة الحالية هي ازمة الكهرباء والــ ” موية ” واسواء حاجة انك تستغل انسان في ضرورياته
للاسف ازمة الكهرباء خلقت شي من الطمع والجشع وانعدام الضمير يخليك تشفق على هذة الامة وهذا الشعب من عاقبة امرهم هذا
ناس عايزة تغنى باي طريقة حلال او حرام مافارقة محل مافي ازمة تفكر كيف انها تستفيد منها وتتكسب باكبر قدر ممكن
دور الكارو حق الموية سهمه في الطالع زي الدولار كل ساعة سعر لحد ماوصل في مناطق عشرين الف والماعنده كارو اجر عشان يحصل الازمة دي يكسب منها قبل ماتخلص او تجي الكهرباء او تشتغل الموية بالطاقة الشمسية.
لكن هي الطاقة الشمسية زاتا وينا حتى هم زادوا اسعارهم لانها بقت الخيار الوحيد المتاح مع العلم انها معفية من الجمارك بس اصحاب الضمائر التعبانة ماعايزين يعفوا هذا الشعب من المعاناة دي.
اما الطامة الكبيرة موضة ايجارات الميتورات او البابور بالساعات
ودي نوع جديد او مهنة جديدة او فرصة عمل او شغل ظهر جديد وحتى الحريم شغالات فيه
ايجار البابور ساعات عشان كل حلة فيها بير يقدروا يشغلوا البير ويملوا الموية لفترة يومين تلاتة لحد تاااني تجيهم فرصة ايجار
طبعا بالشيرن الناس تلقط من البيوت الحول البير الف والفين حق ايجار البابور وجالون البنزين لمدة تلاتة ساعات
في بداية الازمة كانت التلاتة ساعات للبابور تلاتة الف وعليك البنزين ومع مرور الايام وانتشار فكرة ايجار البابور بقى زي الدورلار والكارو برضو وكل يوم الايجار في زيادة
اليوم ايجار البابور لتشغيل موية الابيار في الاحياء التلاتة ساعات بقت بــ” عشرة الف ” وعند ناس بقت اكتر
لانو بقى مصدر رزق وشي الناس مجبرة عليهو عشان يشربوا موية في ظل عدم الكهرباء دا بس دا اكبر مصيبة من فكرة الاستغلال نفسه انك تستغل في الموية وهي في الدين تعتبر افضل الصدقات وفضل السقيا عند الله لايجازيه اي فضل
ازمة ” الموية ” كان ممكن تكون فرصة لاي زول يراجع بيها ربه ويبني بيها صدقة عند الله تنفعه يوم يلاقى المولى يوم لا ظل الا ظله جرعة الموية البقدمها دي ممكن تكون ليك ظل في اليوم داك وافضل من فتافيت من المال اكتسبتها في الاستغلال والطمع في جمعها من المحتاجين لجغمة موية .
نحن شعب يجيد استغلال الازمات بدون ضمير ولا خجل ولا خوف من الله والمشكلة خادعين نفسنا وغاشين علي روحنا ومدعين المثالية وانو نحن الشعب الطيب واصحاب نخوة وقيم ومبادئ
بس الواقع بحكي حاجة تانية وبعكس صورة حقيقية بتوريك انو نحن غير كدا ومحتاجين وقفة من نفوسنا
حسبنا الله ونعم الوكيل ……
