الجنرالات والكوز وعدد مقدر من البلابسة وكل المغيبين ما عندهم مشكلة مع التمليش والمليشيات كمبدأ ..

هشام علي
الجنرالات والكوز وعدد مقدر من البلابسة وكل المغيبين ما عندهم مشكلة مع التمليش والمليشيات كمبدأ .. وما عندهم مشكلة مع الجريمة والأجرام كمبدأ .. مشكلتهم إنه المليشيا والمجرمين وإجرامهم ما يكون في صفهم ، فقط لا غير ..
عشان كده بتلقاهم من أمبارح بنططوا وماليين الدنيا عوا بأنه الجيش حسم مليشيا اولاد قمري
لحدي أمبارح ما عندهم مشكلة في إنه اولاد قمري مليشيا خارجة عن القانون ..
لحدي أمبارح ما عندهم مشكلة في أنه اولاد قمري أصلاً مهرباتية .. وياريتهم لو بهربوا كبريت وحجارة بطارية وبامبرس ، بهربوا مخدرات.
لحدي أمبارح ما عندهم مشكلة في إنه اولاد قمري ، بدمروا في الشباب وفي مجتمع كامل بالمخدرات.
لحدي أمبارح ما عندهم مشكلة في إنه اولاد قمري الإستخبارات تسلمهم عربات وسلاح وعتاد ولبس ، قيمتها مخصومة من ثروات المواطن ولبن الأطفال وعلاج العجزة والمسنين.
لحدي أمبارح ما عندهم مشكلة في إنه اولاد قمري بستخدموا العربات والسلاح في فرض نقاط تفتيش بوكو يقلعوا بيها أتاوات من المواطنين.
لحدي أمبارح ما عندهم مشكلة في إنه اولاد قمري ، العربات والسلاح ده ما أطلقوا منه رصاصة واحدة تجاة أي عدو ، وإنما العربات بهربوا وبوزعوا بيها المخدرات والسلاح والميري بنهبوا بيه عرق جبين المواطن.
لحدي أمبارح ما عندهم مشكلة في إنه اولاد قمري ، يختطفوا ويعتقلوا ويسجنوا وبعذبوا أي مواطن يعارض مصالحهم الإجرامية.
لحدي أمبارح ما عندهم مشكلة في إنه اولاد قمري ، يقلعوا أتاوات من المعدنين الأهليين ، ويفرضوا على المواطن بقوة السلاح وجود شركات التعدين وسمومها القاتلة مقابل اتاوة من كل شركة.
لحدي أمبارح ما عندهم مشكلة في إنه اولاد قمري يقتحموا اقسام الشرطة وعنوة وإقتدارا يطلقوا سراح مهربي ومروجي المخدرات.
لحدي أمبارح ما عندهم مشكلة في إنه اولاد قمري لو طلبتهم أي دولة كمرتزقة زي الموجودين في اليمن الان ، طواااالي يرسلوهم ، ويتضخموا ويسمنوا ويشحموا ويبقوا “جنجويد” المستقبل.
مشكلتهم الوحييييدة إنه اولاد قمري وأي مليشيا اخرى ومجرميها وأجرامهم ما يكون لصالحهم .. مشكلتهم كييييف المليشيا العملوها وكبروها وشحموها تخرج عن طوعهم وترفع السلاح الأدوه ليها في وشهم .. دي مشكلتهم الوحيدة مافي غيرها.
إذا أمبارح إتحسمت مليشيا واحدة .. في لسه 103 مليشيا تلتينهم قنابل إنفجارها مؤكد في أي لحظة تضارب مصالح .. وكالعادة نبقى في عاااااك ديل إتمردوا ، عوووووك أستنفروا ألحقوا الكرامة.
#جنجويد_رباطة
#اي_كوز_ندوسو_دوس
#مافي_مليشيا_بتحكم_دولة
#العسكر_للثكنات_والجنجويد_ينحل