من الأرشيف
لم يتم ذلك الرجل جملته:-على بالطلاق ال…..إلا ووجدنا أنفسنا كررررررر والحافلة منقلبة بينا
تلفت حولى ووجدت الحافلة (شلعوها الخوالدة)ما يجى زول ناطى لى …دا ضرب مثل ساى…
وفى مثل هذه الحالة يعجبوك الناس …زى الدقو ليهم بندق زى ما بتقول حبوبة رؤوس مطله بالشبابيك مادة يدينا جيبو يدينكم هوى النطلعكم …. شعرت ان بيدى خطب ما فتحاملت على نفسى ووقفت وأمسكت بيدى كانت الحافلة قد انقلبت ثم إستقرت على جانبها وكان الزجاج الامامى غير موجود فبدأ كباب يمكننا الخروج منه …كلنا خرجنا منه وتساءلت بإستغراب :-هو نحن المفروض نكون مهجومين وللا القالو نطلعكم بالشباك ديل ؟!! اما حاجة عجيبة !!!!! ولمحت الرجل بتاع الطلاق محمولا على الايدى -كلو منك ….ترمو فى الطلاقات كدا ساى والمرا يا حليلا فى أضان طرش – فيما بعد عرفت انه يعانى من كسر فى الترقوة كونه كان فى الكرسى المقابل لباب الحافلة …-أعملو حسابكم – ففي عربات المواصلات العامة عدد من الكراسى الملغمة يمكن لأحدكم ان يتبناها كدراسة تعتمدها وزارة النقل ومن ثم تترك خالية لسلامة الركاب ..
إمراة تصرخ بهستريا :-الليلة اولادى كان ح إتيتمو ووووب ووووب … ورجل (يضلع)برجل واحدة …الكمسارى والسواق واقفان يتفرجان ..ماعارفة ادى الناس باقيهم وللا لا!!! .ودائما ماينجو الكمسارى لأنه مشعلق على الباب …أها السواق دا( قلبا وقعد)…زى زول كدا هههههه
خمونا بربطة معلم الى أقرب مستشفى حكومى حيث لاحظت الآتى:- لازم يكون معاك مرافق عشان يساسق ليك لجلب الادوية الما موجودة .
-لازم يكون معاك قروش عشان الإسعافات دى ما مجان حتى لو حادث وللا غيره .
– لازم يكون تلفونك جاهز للإستنجاد بزول يلحقك.
-حتنجدع كدا لمن الزول يصلك ولكنك لن تعدم أصحاب المروءة من الأطباء الذين كثيرا ما (يشيرو )لشراء الادوية الإسعافية شاش وحقن وغيره.
المهم الى أن ياتينى واحد من البيت تحاملت وشايلة يدى وذهبت للصيدلية خارج المستشفى وكان من الممكن توفير كل الأدوية بصيدلية المستشفى نفسه .. وبالبيع برضو.. اها …جبت حقنة مخدر وشاش وجبص وكانت صورة الأشعة قد بينت كسر صغير بعد الكف مباشرة لذا فقد تقرر تجبيصها ..
أخدت حقنة المخدر فى عضل الرجل وأظن كان مفروض اخدها فى اليد مكان حيشتغلو …لذا وقفت بعيد وقررت ان أعض على يدى بالنواجذ ..تشاورن البنيات فيما بينهن وهمست واحدة:-أمشوا نادو لينا فلان وفلان
-نعلهم حيمسكو لى يدى ويشدوها لى ؟!- قلت فى نفسى….ثم بصوت عال:-هوى جيبوا لى دكتور كبير والله بتاع الاشعة قال لى كسر صغير وما بديكم يدى دى كان نططتو!
تم إستدعاء طبيب مشيب كدا هههههه إطمأنيت ليه وأمن على كلامي وان اليد لا تحتاج لشد وقال يخاطبها :- جبصى طوالى
وكانت هى قد بدأت بالفعل فى( عبير) الشاش على طول طاولة كدا جنبى فصحت مرة أخرى :-إنتى عايزة تجبصى لى يدى كلها توقفيها لى عود؟نقصى الشى دا ..جبصى حتة بس من هنا لهنا …
كان الطبيب لايزال موجودا فأمن مرة اخرى على كلامى …شعرت بالزهو -هو الطب دا الا يقروه ستة سنة يعنى؟- عاين دى عليك الله لقت الشاش الجبتو كتير وما صدقت-
التحية لأولادنا الاطباء المتدربين وأنا لا اقصد التقليل من شأنهم ..مجرد حكى موقف طريف …ربنا يوفقهم فكثيرين صادفتهم يعملون بتجرد ويبذلون الكثير من العطف للمرضى وينفقون من مالهم لشراء دواء عاجل يحتاجه مريض …هم أبناء هذا الشعب ويحلمون بمستشفيات مهيئة بكامل معداتها حتى يبدعون .
